SHILLONG: Ri Bhoi a·jani Marmain-o donggipa Sacred Heart Secondary School-o Jisuni statue aro Kristianrangni ma·manti noksarangko ra·galchina gita Assam-ni dolsa NGO, ka·mikkenataniko on·aha ine matnangenba Bristibar salo Ri Bhoi a·jani Ri Bhoi Youth Development & Social Organisation (RBYDSO), Ri Bhoi Youth Federation (RBYF), Hynniewtrep Youth Council (HYC), Hynniewtrep Integrated Territorial Organisation (HITO), All Meghalaya Karbi Association (AMKA), aro Synjuk ki Rangbah Shnong Marmain Area (SRSMA) dolrang, Ri Bhoi a·jani Deputy Commissioner baksa tom·aniko ong·atangaha.
Ri Bhoi a·jani Deputy Commissioner baksa tom·e chanchirimani ja·man SRSMA-ni dilgipa Dhiren Klein aro AMKA-ni secretary Bistocan Timung-ni kobor ra·timgiparangna parakatani gitade, re·anggipa February 25 tariko, Karbi Traditional Faith Association (KTFA), Assam-ni simao tom·aniko ong·atangenba, ia skulo tarie donenggipa Jisu Kristoni statue aro Kristianrangni gipin noksarangko ra·galchina gita skulni dilgiparangko ka·mikkenataha ine ia skulo poraienggipa chatro chatrirang aro ma·a paarangoniko ma·sina man·aha.
Ia statue-rangko aro Kristianrangni tarie dongipa bimangrangko ra·galjagenchimode uamang an·tangtangan pe·gale galgen ine KTFA ka·mikkenataniko on·aha ineba SRSMA aro AMKA-ni dilgiparang parakataha.
Indita bilsirangna ia jolrango dingtang dingtang jatrang meli nangrime janggi tangahaoba da·o iandakgipa obostarang ong·engaha ine an·tangtangni suk ong·gijaniko parakatengon, iani bidingo sandirokanirangko dakenba ta·raken ja·kurangko de·china Joint Action Committee-ni dilgiparang, Ri Bhoi a·jani DC-ko didiataha.
Sacred Heart School-ni kamrango Assam-ni Sanmilita Sanatan Samaj, kragija dake kamrangko ka·na jotton ka·enga ineba JAC suk ong·gijaniko parakataha.
