SHILLONG: Meghalaya Board of School Education (MBOSE)-ni Secondary School Leaving Certificate (SSLC) board porikkako re·baenggipa March 4 tarikoni a·bachengatgnok.
Iani bidingo u·iataniko on·atengon, MBOSE-ni SSLC porikkako March-ni 4 tariko a·bachengatgen aro Higher Secondary School Leaving Certificate (HSSLC) porikkakode March 1 tarikonin a·bachengskagnok ine a·dokni Education Minister Rakkam A Sangma parakataha.
Education Minister-ni u·iatani gitade, ia bilsini HSSLC porikkako a·dokni dam 108 centre-rango ra·enga aro SSLC porikkako dam 159 centre-rango ra·skaenga.
SSLC aro HSSLC porikkani somoirango bijolirangko kimitjawa ine ku·rachakaniko on·atengon, porikkani somoirango bijoli sianirangko champengna gita sorkari pilakkon tarisamsoe donmanaha ine Sangma parakataha.
SSLC aro HSSLC porikkarangko name matchotatna man·na gita porikka sechakgipa centre-rango police official-rangko aro flying squad-rangko donanggen ineba ua aganaha.
SSLC porikkako March 4 tariko a·bachengatenba, March 15 tariko matchotatna siengon, HSSLC porikkako March 1 tarikoni a·bachengatenba March 27 tariko matchotatskana siengachim.
