TURA: Ia 2024 bilsini Common University Entrance Test (CUET) porikkako Tura Don Bosco College-ni sak 500-na baten final semester chatro chatrirang sena siengani gimin Sukrobar salo, ia chatro chatrirangna dingtangmancha CUET-ni bidingo awareness program-ko ong·atangaha.
Ia awareness program-ko Don Bosco College, North Eastern Hill University Tura Campus-ni College Welfare Advisory Committee baksa nangrime ong·ataha aro ia program-ko dingtangmancha CUET PG porikka aro NEHU-o admission ra·ani niamrangni gimin chatro chatrirangna talate on·na gita ong·atangaha.
Ia awareness program-ko NEHU Tura Campus-ni ning·o donggipa College Welfare Advisory Committee (CWAC)-ni Chairman aro Association Professor Dr Binu Mathew dilangaha aro CUET PG porikkani bidingo aro NEHU-o admission ra·ani niamrangko chatro chatrirangna agan-talate on·angaha.
Iana skang, Tura Don Bosco College-ni Principal Fr Bivan Rodriqes Mukhim, rimchaksoani kattarangko aganangengon, ia 2024 bilsini CUET PG porikkako sena gita final semester-o poraienggipa chatro chatrirangoni 90 percent-mangni gita register ka·manaha ine parakataha.
Bon·kamao mittelpilani kattarangko, Don Bosco College-o CUET-ni Nodal Officer ong·enggipa Dr Colnat B Marak aganangskaaha.
