TURA: Burma a·songni gue gran (supari)-rangko Bangladesh a·song gita Meghalaya a·dokona niam gri badingsrukbaengani a·sel gue bagan dake cha·enggiparang noksan ong·na nangtokengani gimin gipin Bangladesh a·song gita niam gri gue ra·napbaaniko champengchina A·chik Conscious Holistically Integrated Krima (ACHIK) dolba dabiangaha.
“Gipin a·songrangoniko niam gri gue badingbaaniko ACHIK raken jegalatenga. Iandake niam gri gipin a·songoniko supari ra·baengani a·sel a·doktango gue bagan dake cha·enggiparang noksan ong·atako man·na nangengan baksana iano gipin nangchakeanirangba donga. Skanggipao supariko cha·aniara mandena namgijaniko ra·bana man·a maina suparirango ma·manti samrangko jakkalchapna gitaba man·a. Iandake niam gri gue badinganiara a·dokna noksan ong·atanikoba ra·bana man·a,” ine ACHIK dol parakataha.
Niam gri gue gran badingbaaniko champengchina district administration-ko didiatengon, sima arirango niam gri bading chiwalaniko mikrakbate nirok sandichina, rakbatgipa niamrangko ra·gatchina aro a·song damgnini gisepo bakrime iandake niam gri supari aro ma·manti bosturangko badingsrukaniko nirok sandichina ACHIK didiataha.
Iandakgipa kamrangko mikrakbate nirokchina aro niam gri bading chiwalgiparangko nikgenchimode ta·raken official-rangna u·iatchina gitaba ACHIK, sima jolrango songdongenggipa manderangko didiataha.