SHILLONG: Meghalaya a·doko komibeoba dam 154 songrang bijoliko man·kujae andalaosa dongna nangtokkuengani gimin sorkarini ra·gatgipa rural electrification scheme-rangara, ia songrango maming dakchakanirangko on·na man·jaenga.
Koborko on·ani gitade, bijoliko man·kugijagipa songrangara South Garo Hills-o dam 50, Ri Bhoi aro West Garo Hills a·ja damprakon dam 17, West Khasi Hills-o dam 15, South West Khasi Hills-o dam 12, West Jaintia Hills-o dam 12, East Garo Hills-o dam 10, North Garo Hills-o dam 8, East Jaintia Hills-o dam 4, East Khasi Hills-o dam 4 aro South West Garo Hills a·jao dam 3 ong·engachim.
Bijoli man·kugijagipa songrangna ma·mong sorkarini ra·gate on·na sienggipa scheme-chi bijoliko on·na sienga ine sorkarioni kobor on·aha.
India a·songo nokdang ge·antinan bijoliko sokate on·na man·na gita ma·mong sorkari, 2017 bilsini October jaon Saubhagya scheme-ko a·bachengate on·ahachim aro ia scheme-ko jako ra·na gita Meghalaya sorkariba 2018 bilsini March jao ku·rachakahachim.
Indake ong·genchimoba, Deen Dayal Upadhyaya Gram Jyoti Yojana (DDUGJY) aro Saubhagya scheme-ni bidingo CAG-ni performance audit-ko ka·on, ia kamrangko Satnam Global company-na 2019 bilsini January jao on·anichi a·dokna gong kror 149.21 koros ong·aha ine nikna man·ahachim.
Smart meter-rangko install ka·ani aro Saubhagya Scheme-ni kamrangni bidingo ma·mongni agency-rangchi sandirokchina dabie, Opposition Trinamool Congress (TMC)-ni dilgipa aro a·dokni gitcham Chief Minister Mukul Sangma-ba a·songni Prime Minister Narendra Modi-na sedoatahachim.