AMPATI: South West Garo Hills a·jao District Commerce & Industries Centre (DCIC), Meghalayan Age Ltd, Meghalaya Tourism, Meghalaya Grassroots Music Project aro Nokpante Productions baksa nangrime salgittamna ong·atenggipa District Level Industrial Exhibition-ko Budbar salo, Mahendraganj constituency-ni MLA Sanjay A Sangma do·ga oe on·angaha.
Ia salgittamna ong·atenggipa exhibition-ko Ampati-ni Students Field-o ong·atenga aro ia exhibition-o dingtang dingtang bosturangko mesokenggipa stall-rang baksana mini fitness centre, audio-visual room, food stall-rang, photo booth, Nokpante Production baksana Meghalaya Grassroot Music Project-ni ning·o git ring·e mesokanirangkoba nikangna man·gen.
Ia District Level Industrial Exhibition-ko a·bachengate on·anganio Mahendraganj-ni MLA, jinmana aganprakangengon, an·tangtangni changa sapanirangko jakkalna nangani gimin, CM Alleviate scheme-na dorgastorangko galani gimin aro jakni kamrangko ka·anichi an·tangtangna janggi tangani cholrangko tariani gimin aganangaha.
Ia sal somoirango dingtang dingtang ostro aro kolrangchi kamrangko ka·anio altubatatako man·aha ine janapatengon, iandakgipa gital kolrang donggenchimoba an·tangtangni changa sapanirangko galchipjachina Sangma didiangaha.
Ia tom·anio Betasing C&RD Block-ni BDO CRN Sangma-ba jinmana aganprakangengon, iandakgipa exhibition-rangko ong·atanichi songo noko bading chiwale cha·enggiparangko tang·doatna cholrang ong·a ine parakangaha.
Ia tom·ajio South West Garo Hills a·jani SP Vikas Kumar-ba jinmana aganprakangengon, an·tangtangni jaktangchi tarienggipa bosturangko nambate pack ka·anichi bading chiwalaniko tang·doatchina didiangaha.
