TURA: Tura jillani badiaba badiaba biaprango be·en bitin aro na·tokrangko Tura Municipal Board (TMB)-ni tik ka·e on·gimin damna bate palenga ine badi ka·anirangko man·soahani gimin, tik ka·e on·gimin damna bate paljachina gita TMB-ni Chief Executive Officer (CEO), be·en bitin palgiparangna mikrakataniko on·ataha.
Tura Municipality-ni ning·o be·en bitin aro na·tokrangko palgiparangna TMB, re·anggipa bilsini October 22 tarikon damrangko tik ka·e on·manahachim ine nikna man·a.
Dongimin damna bate be·en bitinrangko palna man·jana gita aro manderang damrangko nie ra·na man·na gita Tura jillani wilwilao be·en, na·tok, do·o aro do·chi palenggipa pilak dokkanrangon damrangko tape donchina gitaba TMB ge·etaniko on·ahachim.
Indake ong·engon, Tura jillani badiaba badiaba biaprango be·en bitin aro na·tokrangko dongimin damna palengani gimin aro dokkanrangko damrangko mesoke paljaengani gimin TMB-ni dongimin niamrangko pe·genchimode licence-rangko den·galgen ine TMB-ni CEO mikrakataniko on·ataha.
TMB-ni tik ka·e on·gimin damrango palchina ge·etaniko on·atengon, dokkanrango be·en bitin, na·tok aro uandakgipa pilak bosturangni damrangkon tape donchina gitaba CEO u·iataha.