TURA: A·gilsakni gipin biaprango gitan Garo Hills-ni dingtang dingtang biaprangoba International Women’s Day-ko Sukrobar salo maniangtokaha.
Ia International Women’s Day-ko maniani bak gita dingtangmancha Dadenggre Block-ni ning·o donggipa Debragre songoba program-ko ong·atangaha aro ia program-ko ong·atanio, Tura-ni MP Agatha K Sangma, mongsonggipa sokgipa ong·e bak ra·angaha.
Ia tom·anio ua jinmana aganprakangengon, songsalni namroro silroroanio me·chikrangni on·gilgipa kamrangni gimin janapangenba, nokdangoba me·chikrangan ka·sae dangdike on·giparang ong·a ine parakangaha.
Me·chikrangko mangrakbatatna gita sorkarini ra·gate on·gipa dingtang dingtang scheme-rangni giminba ia tom·anio Tura-ni MP, agan-talate on·angaha.
Ia program-ko ong·atanio dongpae bakko ra·anggipa gipin manderangara, Tikrikilla-ni MLA Jimmy Sangma, Gaguapara MDC Dhormonath Ch Sangma, Dadenggre-ni BDO Saljagring Momin aro gipinrang ong·a.
South West Garo Hills a·jaoba apsan daken ia International Women’s Day-ko Betasing C&RD Block-ni ning·o donggipa Baispara songo maniangaha aro ia salko manianio, dingtang dingtang department-ni official-rang, me·chik bading chiwalgiparang, me·chik dolrang, self help group-rang, Nokmarang aro dingtang dingtang songni manderangba bak ra·angtokaha.
Ia tom·anio Betasing PHC-ni Senior Medical & Health Officer Dr Midrose R Marak, mongsonggipa sokgipa ong·e jinmana aganprakengon, me·chikrangan nokdang aro songsalni pangchakani krongrang gita ong·ani gimin me·chikrangna an·seng baljokaniko nangchongmota ine aganaha. Pangchakani krongrangan bilgrigenchimode nokdang ba songsal be·gruna man·aia ineba Dr Marak aganaha.
Me·chikrangni man·ronggipa dingtang dingtang sabisi sakanchirangni gimin janapangengon, iandakgipa sabisirangko chel·chakani gimin talataniko on·angenba, pilak me·chikrangkon salo baditaba kontarangnade be·enni gita kam ka·aniko nanga ine aganangaha.
Iana skang, SWGH a·jani District Social Welfare Officer ZR Marak-ba jinmana aganprakengon, ia salara me·chikrang ong·e saksa sakgipinko dakchakgrikna, namgipa songsalko rikna aro me·chikrangni chagrongna nangenggipa dingtang dingtang neng·nikanirangko namatna gita manderangna mikrakataniko on·ani sal ong·a ine parakangaha.
Ia salko manianio dongpae jinmana aganprakanggipa gipin manderangara, Ampati DCPU-ni Legal-cum-Protection Officer Tanya D Ch Marak, District Hub for Empowerment of Women-ni DPC SJR Marak aro gipinrang ong·a.
South West Garo Hills a·jani Betasing Block office aro Rerapara Block-rangoba ia International Women’s Day-ko maniangtokaha.
International Women’s Day-ko maniani bak gita ABVP Tura unit, dingtangmancha me·chikrangna robol kal·susaaniko West Garo Hills a·jani Bolbokgre songo ong·atangskaaha aro uni ja·man jatni gitcham kal·susaanirangkoba ong·atangaha.
Apsan daken, Tura Christian College-oba International Women’s Day-ko maniangaha aro ia tom·anio, Dengnakpara-ni MDC Sadhiarani M Sangma mongsonggipa sokgipa ong·e bak ra·angaha. Ia tom·anio, Mothers Union-ni secretary Sume B Sangma, Guest of Honour ong·e bak ra·angskaaha.
Ia tom·anio, Dengnakpara-ni MDC Sadhiarani Sangma, jinmana aganprakangengon, dilgipani kamrangko jako ra·china gita college-ni chatrirangko didiangenba, songsalo me·chikrangni namgnina kamrangko ka·china gitaba didiangaha.
Ia tom·anio Mothers Union-ni secretary Sume B Sangma-ba jinmana aganprakangengon, songadam nokadamrango me·chikrangni chakna nangenggipa dukrangni gimin janapangenba, me·chikrangni kosako onchepani aro kragija dakani kamrangko bon·atchina didiangaha.
Ia me·chikrangni salko manianio Tura Christian College-ni gita dingtangmancha, bilsi 25-na Leprosy colony-o dangdike on·enggipa Dilme A Sangma aro Tura Christian Hospital-o dangdike on·enggipa Rosetry Ch Marak-na mande ra·pilskaanikoba dakangjolaha.
Indake ong·engon, Tura-ni Don Bosco College-oba Internal Complaints Committee (ICC)-ni gita International Women’s Day-ko manidilangaha aro ia manianio, Tura College of Community Science-ni ning·o donggipa Food Science & Nutrition-ni Assistant Professor Dr Natasha R Marak, mongsonggipa sokgipa ong·e bak ra·angaha.
Ia International Women’s Day-ko maniani bak gita dingtangmancha Debate competition-koba ong·atangjolaha.
