TURA: Garo Hills Autonomous District Council (GHADC)-o kam ka·enggipa manderangna jagnini dormaha baksana DA-rangko on·na ku·rachakahani gimin March-ni 11 tarik dipet Non-Gazetted Employees Association (NGEA)-ni indefinite strike ba ari gri jingjengatna tik ka·aniko ra·galatpilaha.
Iani bidingo kobor ra·timgiparangna u·iatengon, GHADC-o kam ka·enggiparangna jagnini dormaha baksana DA-ko on·china gita Chief Executive Membor (CEM) Albinush Marak, ge·etaniko on·manahani gimin March-ni 11 tarik dipet ari gri jingjengatna tik ka·aniko dontongatengaha ine NGEA-ni president Brithen M Sangma parakataha.
GHADC-o kam ka·enggiparang gimik a 32-ni dormaharangko man·kujaengani gimin adita salrangna skang, Tura-ni College Field-o salgittamna asonge jingjengatahachim aro uamangna dormaharangko on·ani bidingo GHADC-ni Executive Committee, maming aganchakanirangko on·jahani gimin da·o March 10 tarikona somoiko on·dapahachim. March 10 tarikni gisepo GHADC-o kam ka·enggiparangna dormaharangko on·ani bidingo maming aganchakanirangko on·jagenchimode March 11 tarik dipet indefinite strike-ko ka·anggen ine NGEA tik ka·angahachim.
Indake ong·engon, GHADC-o kam ka·enggiparangna jagnini dormaha baksana DA-rangko on·na gita GHADC-ni CEM ku·rachakaniko on·atahani gimin NGEA-ni definite strike ka·na manchianiko dontongatpilaha ine Sangma parakataha.
GHADC-o kam nanggiparang office-ona re·bae kamrangko ka·na man·aigen aro salantian office-ko kuligen ineba NGEA-ni president parakataha.
