TURA: Burma a·songo tarigipa gue gran (supari)-rangko niam gri Bangladesh gita a·songona badingsrukbaengani a·sel Garo Hills-ni songadam nokadamrango gue bagan dake cha·paenggipa nokdangrangsa neng·nikanirangko chagrongna nangtokengaha ine Tura-ni MDC aro BJP-ni state vice president Bernard N Marak parakatenba, iandake niam gri gue badingsrukanio sawa jak donga ine sing·doataha.
Gue bagan dake cha·enggipa manderangni parakatani gitade, pangna bilsian February jao guerangko bang·bate palna man·ani gimin uamang an·tangtangni guerangko palna gita Assam-ni gue badinggiparangko senge dongtokengachim indiba February jao gue badinggiparang uamangona re·bajahani gimin uamang am·sandion, Burma a·songni gue granrangko dam komibate man·engani giminsa darangan Garo Hills-ni guerangko bretokjaenga ine gue bagan dake cha·enggiparang ma·sina man·aha.
“Assam-o gue badinggiparangna phone ka·e sing·sandiaton, uamang chingni guerangko dam rakdugaani gimin brena man·jawa ine aganchakataha. Burma a·songni gue granrangko, Bangladesh a·song gita Meghalaya a·dokni dingtang dingtang ramarang gita ra·bae, ia gue granrangko kg-prako gong 260 ka·e palenga indiba chingni korosrangko hisape iandake dam nom·dugaede palna man·skaja,” ine Garo Hills-o gue bagan dakenggipa manderang parakataha.
Gue bagan dake cha·enggipa manderangni parakatani gitade, batanggimin bilsirango uamang gue bag-prakon gong 6500-mang ka·e palna man·achim indiba ia bilsiode gueko bag-prako gong 4000-na bate palna man·tokskajaengahachim.
Indake ong·engon, iandake niam gri guerangko gipin a·songrangoniko ra·baengani a·sel Garo Hills-o gue bagan dake cha·paenggipa nokdangrang, an·tangtangni guerangko palna man·jae noksan ong·na nangtokenga ine Tura MDC parakataha.
“Garo Hills-o iandake niam gri gue badinganio sawarang jak donga? Garo Hills-o gue bagan dake cha·paenggipa hajalni hajal nokdangrangni namgnina iandake niam gri gue badinganiko ta·raken dontongna nangchongmota,” ine Marak parakataha.
