TURA: West Khasi Hills a·jani Aradonga jol gita niam gri koelarangko salruraengani a·sel rama jal·langrang nosto ka·ako man·tokenga ine Aradonga-ni Association for Democracy & Empowerment (ADE) aro A·chik Holistic Awakening Movement (AHAM) dolrang matnangatenba, iani bidingo Aradonga police outpost-o FIR ka·doangaha.
“Koelarangko niam gri aro nangana bate gatenba Athiabari-oni Riangdo-ona dakanggipa rama gita truck garirango salruraenga aro ia truck garirang, challan grisa koelarangko salengani a·sel rama jal·langrang nosto ka·ako man·an baksana a·doknaba noksan ong·na nangenga. Ia rama gita salantian koelarangko salruraengani a·sel rama jol gimikan namsrangjaengaha,” ine ADE aro AHAM Aradonga regional unit-rang, FIR-o parakataha.
Ia rama gita niam grisa koelarangko salruraenga ine janapatengon, check gate aro checkpoint-rango kam ka·enggipa DMR aro transport official-rangni kosako ja·kurangko de·china dolgni NGO-rang dabiataha.
Adita salrangna skangsan, Aradonga Dorbar centre-ni dilgiparangba, ia rama gita koelarangko salruraengani a·sel rama jal·langrang nosto ka·ako man·na nangenga ine matnangatenba, iani bidingo apsan daken FIR ka·doangahachim.
Iani bidingo, West Khasi Hills a·jani Superintendent of Police (SP) Bikram D Marak-o sing·sandiatskaon, ia manderangni badi ka·aniko police-rang am·sandienga indiba badi ka·gipa manderang an·tangtangan sakkirangko on·na gita re·batokjaengani gimin sandirokaniko dakanio neng·nikanirangko man·na nangenga ine parakatskaahachim.
“Ia kamo Transport aro DMR office-rangkoba man·chapani gimin chinga ia department-rang baksa agangrikna jotton ka·enga,” ine West Khasi Hills a·jani SP parakataha.
