New Shillong Water Supply Scheme aro gipin project-rangna pangchakaniko songa

SHILLONG: Shillong songjinmao songdongenggipa manderangna ringani chirangko chu·onga gita on·na miksonganio New Shillong Water Supply Scheme-na Sombar salo, a·dokni Chief Minister Conrad K Sangma, a·dokni Deputy Chief Minister Sniawbhalang Dhar, PHE Minister Marcuise N Marak aro Health Minister Ampareen Lyngdoh baksa pangchakaniko songe on·angaha.
Ia Water Supply Scheme baksana Mawlai Marten-ni Waste Processing & Disposal Site-o Land Reclamation project aro New Shillong Township-ni ning·o ramarangko tarina gitaba pangchakanirangko songe on·angjolaha.
Ia project-rangna pangchakanirangko songe on·anganio a·dokni Chief Minister, jinmana aganprakangengon, ia New Shillong Water Supply Project-na sorkari gong kror 1600-ko chamataha aro ia project-ni skanggipa bakna gong kror 500-mangko watatmanaha ine parakataha. Ia project-ko ja 36-ni gisepon matchotatna nisan donenga ineba ua aganaha.
“Ia New Shillong Water Supply Scheme-na gong kror 1600 tangkarangko chamatahani gimin ian a·doko dal·batsranggipa project-rangoni mingsa ong·enga aro ia water supply scheme-ni ning·o Shillong, New Shillong Township, dingtang dingtang institute-rang aro sak 29,889 manderang songdongenggipa dam 32 songrangna chirangko sokate on·na man·gnok,” ine Sangma aganaha.
New Shillong Township ning·o tarina sienggipa ramarangni bidingo janapatskaengon, Mawkhanu-na ramarangko gong crore 185 korosrangchi taridapna sienga aro kamrangko 2026 bilsini bon·angachibara matchotna ka·dongenga ine Chief Minister parakataha.
Chief Minister-ni aganani gitade, Ummir-oni Mawkhanu-ona, Kynton-oni Lyngkien-ona, Bellefonte-oni New Township-ona, Diengpasoh ramaoni Shillong Bypass-ona aro Bribah Mawpat-oni New Township-ona tarienggipa ramarangko man·chape New Shillong Township ning·o gong kror 343-ni ramarangko da·o tariengaha.
Mawlai Marten-ni Waste Processing & Disposal Site-o tarinagipa Land Reclamation project-ni gimin janapatskaengon, ia biaprango jabolrang bang·rorobaengahani gimin jolni manderangna jajrengna nangani ong·enga indiba ia jabolrangoniko sorkari, manderang jakkalpiltaitaina man·gipa bosturangko tariskagen ine Chief Minister parakataha. Ia project-ko ja 12-oni ja 18-ni gisepon matchotgen ineba ua aganaha.