SHILLONG: Re·anggipa Sonibar walo, Shillong songjinmani Harijan Colony sambao IED boma gopretanina Meghalaya a·dokni police-rang, mande sakgniko rim·aha.
East Khasi Hills a·jani Superintendent of Police (SP) Rituraj Ravi-ni u·iatani gitade, IED bomako gopretanina police-rang, West Jaintia Hills a·jani bilsi 26 ong·gipa Ebakorda Nongpluh-ko Shillong-oniko rim·aha aro West Jaintia Hills a·jani bilsi 58 ong·gipa Thyrson Lymba-ko Dawki-oniko rim·aha.
Rim·ako man·gipa Thyrson Lymba-de HNYF dolni disciplinary secretary ong·achim aro uko police-rang, Robibar salon rim·ahachim.
Rim·a man·gipa manderangko bichal ka·na gita Sombar salo East Khasi Hills a·jani district court-ona rimangaha.
Indake ong·engon, ia a·selni bidingo NGO-ni dilgipako rim·anina HNLC bobil dolni ku·baltitimgipa Sadon Blah, police-rangko matnangataha aro iandake NGO-ni dilgiparangko rim·aniara kraani ong·ja ine parakatskaaha.
Ia a·selni bidingo police-rangni inquiry-na uamang sengkugen aro obostani kri ja·kurangko de·anggen ineba Blah parakataha.
Re·anggipa Sonibar walni 10:30 bajimango, Shillong songjinmani Harijan Colony sambao donggipa Mawlonghat City Bus syndicate-o IED boma gopretahachim.
Ia boma gopretanio, Harijan Colony-ni saksa Lakhan Singh minggipa mande saknaanirangko man·ahachim.
