SHILLONG: Meghalaya a·dokni mingsinggipa Lake ba pokkri dambongako nitobatatna gita Mongolbar salo, a·dokni Chief Minister Conrad K Sangma, dingtangmancha pangchakanirangko songe on·angaha.
Ia dambonga lake ba pokkrirangara, Shillong songjinmao donggipa Ward’s Lake, Malse Lake, Nirman Jheel, Williamnagar-ni Memo Lake aro Resubelpara-ni Rangjokram Lake ong·a.
Ia project-ni ning·o, ia dambonga lake-rangko gital kolrangchi rongtalatna aro nitobatatna kamrangko ka·gen ine iana pangchakaniko songe on·anganio Chief Minister parakataha.
Iana skang, Shillong songjinmako nitobatatna aro apchangket ong·aniko komiatna gitaba a·dokni Chief Minister, mongsonggipa project minggittamna ia apsan biapon pangchakanirangko songe on·angaha.
Ia project minggittamara skanggipao, Shillong Smart City Pvt Ltd-ni ning·o gari donchakani biaprangko rikani, gnigipao Iewduh ba Bara Bazar-ko nitobatate tariani aro gittamgipao Ward’s Lake-ko taridapani project-rang ong·a.
Ia project-rangna pangchakaniko songe on·anganio a·dokni Chief Minister, jinmana aganprakangengon, ia project-rangara Shillong songjinmako nitobatatna aro songjinmao apchangket ong·aniko komiatna a·bachengatenggipa project-rang ong·a ine parakataha.
Shillong songjinmao dam 1200-na baten parking lot ba gari donchakani biaprangko sorkari taridapengaha aro ia salni bako gimik gong crore 90-ni dam 465 parking lot-rangna sorkari pangchakanirangko songe on·aha ineba ua aganaha.
Meghalaya a·doko gitchambatsranggipa anti cha·ram biap Iewduh bazar-ko gong crore 15 tangkarangchi gital dake aro nitobatate taridapna siengaha ineba Chief Minister parakataha.
Ward’s Lake-ni mikkango km 1.2 ong·gipa biapko plaza, parking, restaurant aro dokkanrangko done taridapna sienga aro iako taridapanichi ian tourist-rangnasan namgni ong·aigija jolo bading chiwale cha·enggipa manderangnaba namgni ong·gen ineba Chief Minister aganaha.
