SHILLONG: Da·o ong·atna sienggipa Lok Sabha election-na BJP-ni tikitrangko Shillong aro Tura Parliamentary constituency-na sualanio adita jajaanirang aro ding·chaogrikanirang ong·engon, Meghalaya a·doko BJP-na kam ka·enggipa bang·bata manderangan tikitrangko, BJP-o ong·kamgipa aro BJP-ni niamrangko ma·sigiparangnasa on·china nangniktokenga ine Mongolbar salo, BJP Meghalaya unit-ni gitcham state president Ernest Mawrie parakataha.
Shillong Lok Sabha constituency-o a·dokni Cabinet Minister AL Hek, Fenelia Nonglait, Ernest Mawrie aro chadambe dilgipako man·chape komibeoba sakbri candidate-rang, BJP-ni tikitna nidingengachim ine nikna man·a.
Iani bidingo kobor ra·timgipa manderang baksa agangrikengon, Shillong constituency-ni ning·o donggipa pilak party worker-rangan uko didiahani giminsa uaba tikitna susapana manchiaha ine Mawrie parakataha.
“BJP-na kamko ka·enggipa pilakan angkosa BJP-ni mikkang gita ong·niktokengani gimin election-o angko susachina nangniktokenga,” ine ua aganaha.
Shillong constituency-osan ong·aigija Tura Parliamentary constituency-oba apsan daken baditaba sak candidate-rang BJP-ni tikitna nidingtokengachim.
Adita salrangna skangsan, Lok Sabha election-na BJP-ni skanggipa candidate list-ko parakatahachim indiba ia skanggipa list-ode Meghalaya a·dokni candidate-rangko janapa dongjahachim.
Candidate-ko seokaniara election-o chena gita BJP-na namen gamchatbegipa ong·a ine janapatskaengon, je candidate-an tikitko man·engachim, ua candidate-de kam ka·giparangni chakpaanirangko man·skana nanga ine Mawrie aganaha.