SHILLONG: Citizenship Amendment Act (CAA)-ko ma·mong sorkarini niam dake ra·gatangani ja·man a·dokni dingtang dingtang dolrang, BJP-chi dilenggipa ma·mong sorkariko matnangtokengon, Meghalaya a·dok chu·gimikkon CAA-oniko watchina ma·mong sorkari aro ma·mongo BJP-ni dilgiparang baksa agangrikgen ine a·dokni Cabinet Minister aro BJP-ni dilgipa AL Hek, ku·rachakaniko on·ataha.
“Chingaba iana apsan daken suk ong·ja aro Meghalaya a·dokkosan ong·aigija salgro salaramni pilak a·dokrangkon CAA-oniko watchina nangnikenga,” ine Hek aganenba, iani bidingo uamang jrip dongjawa aro ma·mong sorkari baksa agangrikchongmotgen ine parakataha.
CAA-ni bidingo pilak political dolrangkon apsan ku·mong nangrime ku·rang on·china didiatengon, “An·ching je political dolniba ong·china an·chingni mongsonggipa daitode manderangna simsak nirokaniko on·anian ong·a,” ine Hek aganaha.
Lok Sabha election-na skangmangmang CAA-ni niamrangko ra·gatanichi Meghalaya a·doko BJP-na nangchakeanirang donggenma ine sing·anina aganchakaniko on·angengon, “Meghalaya a·dokko CAA-oniko watchina chinga agangrikenga aro Meghalaya a·dokko CAA-oniko watatna man·ahaode ian chingnaba cholrang nambatgnok maina a·dokni BJP-koba ma·mong sorkaride knachakna nangaigen,” ine BJP Minister aganaha.
CAA-ni niamrangko ma·mong sorkarini parakatani ja·man, Meghalaya a·dok gimikon North East Students Organisation (NESO), Khasi Students Union, Federation of Khasi Jaintia & Garo People, Garo Students Union (GSU) aro uandakgipa dingtang dingtang dolrang, CAA-ni niamrangko segimin lekkarangko so·e sorkarini kamko raken jegalattokahachim ine nikna man·a.
Dingtang dingtang dolrangni iandake jingjengatanirangko dakani ja·man, CAA-ni niamrangko ra·gatanichi Meghalaya a·dokode maming nangchakeanirang dongjawa ine a·dokni Chief Minister Conrad K Sangma parakatskaahachim.
