TURA: South Garo Hills a·jani Nokatgre songo ro·ong quarry-ko chalaie, ia biapni ro·ongrangko bikotna kamrangko a·bachengatengahani gimin Garo Students Union (GSU) Karukol regional unit matnangatenba, ia songo ro·ong bikotaniko champengchina South Garo Hills a·jani Deputy Commissioner-na sedoataha.
GSU Karukol regional unit-ni president Nikudimush R Marak-ni u·iatani gitade, ia songo ro·ong bikotna miksongenggipa biapara, Meghalaya a·doko chubatsranggipa waterfall ba chidarerangoni damsa Re·nang Dare-ko man·chapenggipa biaprangsa ong·engachim aro ia biaprangoniko ro·ong bikotgenchimode ian ia jolni manderangna mikkim rasongko ra·baenggipa Re·nang Dare-ko nosto ka·an baksana ia jolrango songdongenggipa manderangni bagan barirangkoba nosto ka·a gita ong·gnokchim.
Ia songo ro·ong bikotaniko champengjagenchimode, ia jolrango donggipa matburingrangna aro ma·manti sam-bolrangnaba nangchakeaniko ra·bagen ine janapatengon, ia biapo ro·ong bikotaniko champengatja ong·ode South Garo Hills a·jani dingtang dingtang biaprangko nina re·baenggipa tourist-rangba neng·nikanirangko chagrongna nangtokgnok ine GSU Karukol unit parakataha.
Iani bidingo GSU Karukol unit-ni dilgiparang, South Garo Hills-o social activist ine kamko ka·enggipa Greneth M Sangma-koba matnangataha.
“Mamingkoba chanchichenggija Nokatgre songni Nokma, Greneth Sangma-na ia biaponiko ro·ong bikotna gita NOC-ko on·aha indiba da·alo ro·ong bikotna gita ari salgipa biaprangara ia songo donggipa gipin nokdangrangni baganrangkoba man·chapskaaha,” ine GSU Karukol regional unit-ni dilgiparang parakatenba, ia songo ro·ong bikotaniko champengchina Deputy Commissioner-ko didiataha.
SGH-ni Nokatgre songo ro·ong bikotaniko champengchina GSU, DC-na sedoata
Date:
Share post:
