Tura-o donggipa a·kingrangko municipality-o napatna miksonganiko MDC-rang jegala

TURA: Budbar salo, Garo Hills Autonomous District Council (GHADC)-ni special session-ko ong·atangenba, 9-Tura GHADC constituency-ni ning·o ga·akgipa A·kingrangko Municipality-ni ning·o napatna sorkarini miksonganiko MDC-rangko raken jegalangtokaha.
Ia motion-ko GHADC-ni Chief Executive Membor (CEM) Albinush Marak, session-ona ra·baengon, Tura jillani wilwilao donggipa Danakgre, Doldigre, Alotgre, Darechikgre, Duragre, Chasingre, Ballonggre aro Rongkhongre a·kingrangko Municipality-o napatna aro Town Committee-rangni biapo Municipality jako ra·skana gita 1974 bilsio GHADC-ni gitcham Executive Committee resolution-ko pass ka·ahachim indiba iako dakanichi Tribal jatrangna mai nangchakeaniko ra·bagenchim, ua somoio GHADC-ko chalaianggipa dilgiparang namen chanchichengjaha ine parakataha aro uni jegalanio Land & Revenue-ni EM Nikman Marak baksana gipin MDC-rangba chakpaanirangko paraktokaha.
Iani bidingo Tura-ni MDC Bernard N Marak-ba jegalaniko parakatengon, Tura GHADC constituency-ni ning·o ga·akgipa a·kingrangko urban area-o napatna jotton ka·aniara Sixth Schedule-ni niamrang baksana Town & Country Planning 1973-ko pe·ani gita ong·enga ine janapataha.
Marak-ni parakatani gitade, Tura jillani sambao donggipa Danakgre, Doldigre, Alotgre, Darechikgre, Duragre, Chasingre, Ballonggre aro Rongkhongre a·kingni Nokmarang aro GHADC baksa agangrikchenggija, ia a·kingrangko Tura Municipality-ni ning·o napatna u·iatmanahachim.
A·king Nokmarang aro GHADC baksa maming agangrikchenggija ia a·kingrangko Tura Municipality-ni ning·o napatna sorkari miksongenga ine matnangatengon, ian Indian Constitution-ni Article 243ZC-ni ning·o dongimin niamrangko pe·ani gita ong·enga ineba Marak parakataha.
“Danakgre, Doldigre, Alotgre, Darechikgre, Duragre, Chasingre, Ballonggre aro Rongkhongre a·kingrangko Tura Municipality-ni ning·o napatna proposal-ko ra·bana skang a·dok sorkari, a·king nokmarang aro GHADC baksa agangrikchengna nanga maina Scheduled Area-rangode sorkari bil dongja indiba Nokmarang aro autonomous district council (ADC)-rangsa bil man·a. Uni gimin 9-Tura GHADC constituency-ni ning·o a·kingrangko Municipality-ni ning·o ong·atna jotton ka·aniara niamni a·palo ong·a,” ine Tura MDC parakataha.