TURA: South Garo Hills a·jani Nongalbibra-o donggipa hanging bridge ba jal·lang nosto ong·ahani a·sel Simsang chibima nalsao donggipa dingtang dingtang songni manderang neng·nikanirangko chagrongna nangtokenga ine A·chik Organisation for Social Welfare (AOSW) Nongalbibra unit parakatenba, ia jolrango songdongenggipa manderangni namgnina ia jal·langko da·o wachina skangan taripile on·china sorkariko didiataha.
Iani bidingo South Garo Hills a·jani Deputy Commissioner-na seachi u·iatengon, Nongalbibra jolo donggipa Nengsinggittim-oni Darang Boldak, Chimadachit, Nengbrek aro uandakgipa dingtang dingtang songrangona Simsang chibimako kabatgipa jal·lang dongachim aro ia jal·lang gitan Simsang nalsao donggipa manderang bazaar anti cha·na, skulrangchi re·na aro ma·manti nanga kamrangko re·ruratokengachim indiba da·o ia jal·lang nosto ong·ahani a·sel Simsang nalsao donggipa dingtang dingtang songni manderang, wachini somoirangode, dingtang dingtang biaprangona re·ruraanirango neng·nikanirangko chagrongna nangtokenga ine AOSW Nongalbibra unit parakataha.
“Nongalbibra jolo bazar aro skulrang bang·en dongani gimin Simsang chibima nalsao donggipa manderang bazaar anti cha·na aro skulrangchi re·na gitaba ia hanging bridge-kon jakkaltokpaengachim indiba da·o ia jal·lang nosto ong·ahani a·sel wachini somoirango manderang, mongsongbate butchuma budeparang, bi·sarang aro me·chikrang namen neng·nikanirangko chagrongna nangtokenga,” ine AOSW Nongalbibra unit-ni dilgiparang parakatenba, Simsang nalsao songdongenggipa manderangni namgnina ia jal·langko ta·raken wachina skang taripile on·china sorkariko didiataha.
