TURA: Tura jillani wilwilao donggipa a·kingrangko Municipality ning·o napatna sorkarini miksongenganiara niamni a·palo ong·enga ine A·chik Youth Council (AYC) parakatenba, ia a·kingrangko Municipality ning·o napatna ja·ku de·aniko dontongpilchina a·dokni Chief Minister-ko didiataha.
“Skanggipao Sixth Scheduled a·jarango Municipality-ko donanian niamni a·palo ong·a aro Tura jillaba Sixth Schedule ning·on ga·akani gimin ian niamni a·palo ong·enga. Indian Constitution-ni Sixth Schedule ning·o Municipality-rangnade maming bilrangko on·a dongjachim indiba Tura jillako chalaina gita GHADC, Tura Municipal Board (TMB)-na pakwate on·aha,” ine AYC-ni general secretary Maxbirth Gabil Momin parakataha.
Sixth Schedule a·jao municipal area-ko apalbatataniara niamko pe·anisan ong·ja indiba A·chikrangko mande ra·gija mesokani gitaba ong·enga ine janapatengon, Sixth Schedule-ni ning·o ga·akgipa bang·bata biaprangkon TMB jako ra·aha aro a·bachengo GHADC-ni on·gimin ari gita municipal area-ko ja·rikjaenga ine Momin matnangataha.
“Sixth Schedule-ni ning·o Tura Municipal Board-ko chalaiengon Municipality-ni biaprangko apalbatatna gita Urban Affairs department-ni kam ka·anirangara kraani ong·ja. Uni gimin Tura jillani wilwilao donggipa a·kingrangko Municipality ning·o napatna miksonganiko donpilchina anga mol·molatenga,” ine AYC-ni general secretary, Chief Minister-na sedoatgipa chittio parakataha.