ADOKGRE: Pangna bilsi dakrongbaengani gitan ia chang Lok Sabha election-naba National People’s Party (NPP)-ni campaign ka·aniko Sukrobar salo, North Garo Hills a·jao donggipa Adokgre songoni a·bachengattaiaha.
Ia tom·bimonganiko ong·atanio, a·dokni Chief Minister aro NPP-ni national president Conrad K Sangma, Tura Lok Sabha constituency-ni NPP candidate Agatha K Sangma, Shillong Lok Sabha constituency-ni NPP candidate Ampareen Lyngdoh aro NPP-ni dingtang dingtang dilgiparangba bak ra·angtokaha.
Ia tom·anio a·dokni Chief Minister, jinmana aganprakangengon, PA Sangma sagini somoionin uamang election changantian Adokgre songonin campaign ka·aniko a·bachengataha aro ia changoba uamang ia ‘Chenanggre’ songonin a·bachengattaiaha ine parakataha.
“Angni pagipa sagi Purno A Sangma, Adokgre songonin election-na campaign ka·aniko a·bachengatrongachim aro ia songoni campaign ka·aniko a·bachengatanio ua chegipa ong·ahani gimin Adokgre songko ua ka·sabee ‘Chenanggre’ ine mingangaha. Apsan daken da·alo chingaba uni dedrang ong·e, uni bebera·ani gitan ia songoni campaign ka·aniko a·bachengattaienga aro ianonin chingni election-na kam ka·anirangko a·bachengatgnok,” ine Sangma aganaha.
Meghalaya a·dokona agre gipin a·dokrango NPP-ni candidate-rangko susaatani gimin da·o dipet uamang chanchia dongkuja ineba NPP-ni national president aganaha.
“National party ong·e gipin a·dokrangoba NPP-ni candidate ong·e susana gita bang·a manderangan chingona tikitrangko bi·atgiparang donga indiba da·o dipet chinga iani bidingo name chanchia dongkuja. National committee-ni gita angna iako bil on·ahani gimin anga gipin dilgiparang baksa iani bidingo chanchirime ja·kuko de·anggen,” ine ua aganaha.
Ia tom·bimonganio, dingtang dingtang dolrangoni NPP-ona re·bagipa manderangkoba NPP-ni national president aro gipin dilgiparang rimchaksotokaha.
Ia tom·anio Tura-ni MP aro NPP-ni candidate Agatha K Sangma-ba jinmana aganprakangengon, uni chu·sokate on·anggipa dingtang dingtang sorkari scheme-rangni gimin janapangenba, Meghalaya a·dokni manderangna NPP-chi dilenggipa MDA sorkari, pilakni gitan namroro silroroaniko ra·bana kam ka·enga ine parakataha.
