TURA: Tura jillani municipality area-ko apalbatatna gita Urban Affairs department-ni gital dake saltaigipa Draft Master Plan-ko Nokma Council-ba raken jegalataha.
Adita salrangna skangsan, GHADC-ni Special Session-ko ong·atanioba, Tura jillani ning·o donggipa Danakgre, Doldegre, Alotgre, Darechikgre, Duragre, Chasingre, Ballonggre aro Rongkhongre a·kingni Nokmarang aro GHADC baksa agangrikchenggija Meghalaya sorkarini Urban Affairs department, Draft Master Plan-ko tariaha ine matnangenba, iako GHADC-ni MDC-rang raken jegalangtokahachim.
Iani bidingo Nokma Council-ni gita jegalatskaengon, “Tura jillana gital tarigipa Draft Master Plan-o Nokma A·kingo ga·akgipa mitam biaprangko man·chapaha ine adita Nokmarangni badi ka·anirangko chinga man·soaha aro ia kamo Nokmarang baksa agangrikchenggija ja·kurangko de·ahani gimin ia a·kingni Nokmarang suk ong·jae, an·tangtangni a·arangko on·na siktokjaenga,” ine Nokma Council-ni general secretary parakataha.
Koborko on·ani gitade, Tura jillani ning·o donggipa Danakgre, Doldigre, Alotgre, Darechikgre, Duragre, Chasingre, Ballonggre aro Rongkhongre a·kingni Nokmarang aro GHADC baksa agangrikchenggija, ia a·kingrangko Tura Municipality-ni ning·o napatna Urban Affairs department, Draft Master Plan-ko tariahachim.
A·king Nokmarang aro GHADC baksa maming agangrikchenggija ia a·kingrangko Tura Municipality-ni ning·o napatna sorkarini miksonganiara, Indian Constitution-ni Article 243ZC-ni ning·o dongimin niamrangko pe·ani gita ong·enga ine adita salrangna skangsan Tura-ni MDC Bernard Marak-ba matnangatahachim.