TURA: Garo Hills-ni dingtang dingtang block-rango, ma·mong sorkarini on·enggipa dingtang dingtang scheme-rangko ra·na gita Gram Sevak-rangni watchanggalgipa manderangna Centre Scheme Monitoring Committee (CSMC) dakchakanirangko on·e, da·o dingtang dingtang scheme-rangko ra·pana cholrangko man·engaha ine Robibar salo, Tura-ni MDC Bernard N Marak parakataha.
Marak-ni parakatani gitade, dingtang dingtang scheme-ni namgnirangko ra·na gita VEC (Gram Panchayat) secretary-rangni Block-rangna list-ko on·anio hajalni hajal nokdangrangko watchanggalaha ine songni manderang u·iataha. Uandaken VEC-ni gadango nirok sandina, report on·na aro dakchakanirangko on·na gita CSMC-ko songaha aro ia CSMC, watchanggala man·gipa nokdangrangko sandienba biming segate on·anichi da·o ia nokdangrangba ma·mong sorkarini on·atgipa scheme-rangko ra·pana man·enga ine Tura MDC parakataha.
“Batanggimin ru·utbea bilsirangnan bang·bea nokdangrangko gram sevak-rang aro block-rang watchanggalaha ine Monitoring Committee ma·sina man·aha indib da·o songo committee-rangni dakchakanichi ia nokdangrangkoba biming segattokaha. Ia nokdangrangna dakchake on·giparang dongjani a·sel sorkarini dingtang dingtang scheme-rang, jekai PMAY, NREGA, Ration Card, IHHL, Pension aro uandakgipa scheme-rangko man·tokpajaengachim. Ia nokdangrangni bidingo am·sandiani pal, bang·bata C&RD Block-rangon kam ka·giparang chu·ongjani gimin Gram Sevak-rang, VEC secretary-rangkosan ia nokdangrangni bimingrangko chimongchina aganaha indiba VEC secretary ia nokdangrangko segatjaha,” ine Marak parakataha.
Bang·bata Block office-rangon political dilgiparangsa beneficiary-rangko seokrongani gimin scheme-rangko ra·na gita seokanio bang·a nokdangrangan watchanggalako man·ronga ineba Tura-ni MDC aro BJP-ni state vice president Bernard Marak matnangataha.
“Iani a·selan Gram Panchayat-ni gadango scheme-ni namgnirangko man·na nanggipa nokdangrang watchanggalako man·ronga,” ine Marak parakataha.
