SHILLONG: Citizenship Amendment Act (CAA)-ko niam dake ra·gatanichi Meghalaya a·dokna nangchakena sienggipa kamrangna United Democratic Party (UDP), jajrengchaksoaniko parakatenba, Meghalaya a·dok gimikkon CAA-ni niamrangoniko chu·gimik watchina dabiangaha.
“Skangonin chinga party-ni gita CAA-ko raken jegalsoahachim aro chingasan ong·aija iako dingtang dingtang political dolrang aro a·dokni gipin dolrangba jegaltokaha aro da·aloba chinga ia niamko raken jegalengkua,” ine UDP-ni general secretary Jemino Mawthoh aganaha.
Meghalaya a·dokni bang·bata biaprangan Sixth Scheduled a·jaosa ga·akani gimin rang·spena gitade man·enga ine janapatengon, “Indake ong·genchimoba, an·chingni a·dokara Assam baksa nangchapgipa a·doksa ong·a aro Assam a·doko niam gri napsruke songdong a·chaanirangko an·ching bang·en nikna man·aha,” ine Mawthoh aganaha.
“Ia niamna kenna nanganide, Assam a·dokoni bang·en niam gri napsrukbagiparang dongenga. Uni gimin mikkangchi iandakgipa nangchakeanirang dongjana gita an·ching ia obostako ma·sina nangao ga·akenga,” ine UDP-ni general secretary aganaha.
Meghalaya a·doko MRSSA aro ILP gita dakgipa niamrangna bilakbate dabina nangenga ine janapatskaengon, uamang gipin biaprangoni re·baenggipa manderangni kosakode re·enga ong·ja indiba a·doko niam gri napsrukaniko champengna gitade, bilakgipa niamrangkosa nangenga ine Mawthoh parakataha.
Iandake niam gri napsrukanirangna a·dokni Tribal manderangsan ong·aigija a·doko songdongkamgipa Non-Tribal manderangba kenchaktokenga ineba ua aganaha.
“Niam gri napsrukbae songdonggiparangni gimin aganengon, ru·uta bilsirangoni a·doko songdongkamenggipa gipin jatni manderangba apsan daken kenchaktokenga. Chinga uamangni kosako aganenga ong·ja indiba da·o gital dake napsrukbagiparangni giminsa aganenga,” ine UDP-ni dilgipa aganaha.
CAA-ko pass ka·na skang 2018 bilsirangonin salgro salaram a·dokrango songdongenggipa manderang aro dingtang dingtang dolrang Citizenship Amendment Bill-ko pass ka·jachina dabitokahachim indiba ma·mong sorkari, iako knachakgija 2019 bilsio Parliament-o pass ka·e, CAA-ko adita salrangna skangsan niam dake parakatahachim.
Ia CAA-ara, Bangladesh, Pakistan aro Afghanistan a·songrango toromni gita a·rikgalako man·gipa manderangko India a·songo nokchakna gita ra·gatgimin niam ong·a ine nikna man·a.
