TURA: Meghalaya Public Service Commission (MPSC)-ni gita Assistant Audit Officer (AAO) aro Junior Divisional Assistant (JDA)-ni kamrangna ong·atgipa porikkani result-rangko parakanio Job Reservation Policy aro Roster System-ni niamrangko ja·rikjaha ine Garo Graduates Union (GGU) parakatenba, ia result-rangko gital dake nipiltaina gita ge·etaniko on·china a·dokni Chief Minister Conrad K Sangma-ko didiataha.
Ia kam minggnina ong·atgipa porikkarangni result-ko re·anggipa March 14 tariko parakahachim ine nikna man·a.
Iani bidingo a·dokni Chief Minister-na badi ka·e sedoatengon, a·dokni Reservation Policy-o Khasi-Jaintia-rangna 40%, Garorangna 40%, Unreserved-na 15% aro gipin SC/ST-rangna 5%-ko kangahaoba MPSC-ni result-ko parakanio ia dongimin niamko ja·rikjaha ine GGU-ni dilgiparang matnangataha.
GGU-ni Chief Minister-na badi ka·e sedoatgipa chittio parakatani gitade, ia kam minggnina candidate-rangko seokanio Job Reservation Policy-ni niamko ja·rikgija A·chik candidate-rangko komibate ra·aha, cut off mark-rangkoba kragija on·aha aro kamna qualify ong·giparangba chu·ongjahachim.
Uandaken, ia porikkani result-rangko parakani bidingo ning·tue sandirokatenba, result-rangko gital dake nipiltaichina aro Reservation Policy-ni niam gita candidate-rangko ra·china GGU dabiangaha.
