TURA: Meghalaya a·dokoba Lok Sabha election-ko re·baenggipa April jani 19 tariko ong·atna parakatahani gimin aro Model Code of Conduct (MCC)-koba ra·gatjolahani gimin sorkarini biaprango donggipa pakmarango seani, poster tapani aro banner kadeaniko champengna gita West Garo Hills a·jani District Magistrate, Section 144 CrPC-ko ra·gatangaha.
Manderangni nok, bagan ba garirango seachi permission-ko ra·chenggija banner kadeani ba sticker tapani aro flag kadeanikoba District Magistrate, ia niamni ning·o champengataha.
Gari nokgipa an·tangan gario flag kadena ba sticker-rangko tapna on·genchimoba uan ramao re·ruraenggipa gipin manderangna maming man·dikatani ba bringbrangatanirang ong·na nangjawa ineba District Magistrate u·iataha.
Para salgipa garirangoba District Election Officer ba Returning Officer-ni permission-ko ra·chenggijade, flag-rangko kadena ba sticker-rangko tapna man·jawa ine District Magistrate u·iataha.
Election-ni kamrang chu·gimik matchotsrangkujaskal, West Garo Hills a·jao silchidare ba gopretani bosturangko ra·bitna man·jawa indiba ian sipai dolrangnade nangchakeani dongjawa ineba District Magistrate u·iataha.