SHILLONG: Citizenship Amendment Act 2019-ko ma·mong sorkari niam dake ra·gatangani ja·man, Meghalaya a·doko Inner Line Permit (ILP)-ko ra·gatchina dabianirang da·o bilakbatrorona a·bachengtaiaha.
Meghalaya a·dokni bang·bata biaprangan Sixth Schedule a·jao ga·akgipa biaprangsa ong·e CAA-oni watako man·engoba, a·dokona niam gri napsrukanirangko bilakbate champengsona man·na gita dingtang dingtang dolrang, ILP-ko ra·gatchina dabitokenga.
Hynniewtrep Youth Council (HYC)-ni president Roy Kupar Synrem-ni kobor ra·timgiparangna parakatani gitade, Sixth Schedule a·jarangko CAA-oniko watengoba Meghalaya a·dokni chu·gimik biaprangde Sixth Schedule-o ga·akgiparang ong·jani gimin a·dokni chu·gimik biaprangon CAA-ko watna nangenga aro gipin biaprangoni niam gri napsrukbae songdong a·chaaniko champengsona gita ILP-ko ra·gatna nangenga.
“Meghalaya a·dokona napbaaniko nirokna gita maming niamrang dongjani gimin a·dokko ia CAA-oniko watgenchimoba ong·gramanisan ong·aigen aro mikkangchi a·doko niam gri napsrukanirang batroroangnaba gnang ine chinga kenchaksoenga. Uni gimin a·doko ILP-ko ra·gatchina aro a·dokni chu·gimik biaprangon CAA-ko watchina chinga nangnikenga,” ine Synrem aganaha.
Iani bidingo Hynniewtrep Youth Council (HYC), Jaintia National Council (JYC) aro Confederation of Ri Bhoi People (CORP) dolrang, ILP-ko ra·gatchina dabie, a·dokni Chief Minister Conrad Sangma-na memorandum-ko on·ataha.
CAA-ko 2019 bilsio Parliament-o pass ka·chengani somoion a·doko ILP-ko ra·gatchina dabie Meghalaya Legislative Assembly-o dingtangmancha resolution-koba ra·ahachim indiba da·alonan iani bidingo Union Home Ministry maming aganchakanirangko on·skakujaengachim.
Re·anggipa bilsini August jaoba a·dokni Chief Minister Conrad Sangma, Prime Minister Narendra Modi-ko grongenba ILP-ni bidingo agangrikangahachim.
