TURA: Jatni doka dam·anirangko dokna dam·na aro tarina gita skie on·na miksonganio Tura-ni A·chik Literature Society (ALS), NEHU Tura Campus-ni Garo Department aro Tura Don Bosco College-ni Garo Department baksa nangrime, regional workshop-ko March 18 tarikoni March 22 tarikona Tura-ni Chasingre-o donggipa NEHU Tura Campus-o ong·atenga aro ia workshop-ko March-ni 18 tariko, NEHU Tura Campus-ni ning·o donggipa Garo Department-ni Head Dr Jacqueline R Marak, a·bachengate on·angaha.
Ia workshop-ko ong·atanio gimik sak 70-na baten chadamberang, dama, chigring, bangsi aro uandakgipa doka dam·anirangko dokna dam·na skie ra·an baksana Wangala chrokani aro Grikanikoba skie ra·angenga.
Ia workshop-ko a·bachengatanio Dr Jacqueline R Marak, jinmana aganprakangengon, chatro chatrirang an·tangtangni lekka pora baksana jatni doka dam·ani aro chrokanirangkoba skie ra·na gita ian nambegipa chol ong·a ine didiani kattarangko aganangaha.
Ia workshop-o skie ra·anichi chadamberang an·tangtangni changa sapanirangko namdapatan baksana iandakgipa doka dam·ani aro sika moanirangchiba janggi tangani cholrangko ra·na man·gen ineba Dr Marak aganaha.
Ia workshop-o skie ra·enggipa chatro chatrirangara NEHU Tura Campus, Tura Government College, Tura Christian College, Tura Don Bosco College, Tura ICFAI University aro PA Sangma Foundation-o poraienggipa chatro chatrirang ong·a.
Ia workshop-o skie on·enggipa manderangara, Selbalgre-oni Ringjeng T Sangma aro Sotjak Ch Marak, Rombagre-oni Dewal M Sangma aro Lendinbirth S Sangma, Gondenggre-oni Dirot Ch Marak aro Chingchat T Sangma ong·skaenga.
‘Traditional Musical Instruments & Performing Arts’-ni bidingo workshop-ko ong·atenga
Date:
Share post:
