SHILLONG: Lok Sabha election-na da·o baditaba antirangsan dongaiahaon, Ri Bhoi a·jao United Democratic Party (UDP)-ni mongsongbatgipa dilgiparangan National People’s Party (NPP)-o napskana tik ka·angaha.
Adita salrangna skangsan, UDP Ri Bhoi district-ni dilgiparang, a·dokni Cabinet Minister aro Shillong parliamentary seat-ni NPP candidate Ampareen Lyngdoh baksa Ri Bhoi a·jani Mairman jolo tom·e chanchirimangahachim indiba ia tom·aniko ma·mong UDP-ni dilgiparangde jegalatskaahachim ine nikna man·a.
Ri Bhoi a·jao da·o UDP-ni mongsongbatgipa dilgiparangan NPP-o napskana siengahani gimin Shillong parliamentary constituency-o UDP aro HSPDP dolrangni bakrime susaatenggipa Regional Democratic Alliance (RDA)-ni candidate Robertjune Kharjahrin-na nangchakeaniko ra·baskanaba dongaha.
NPP-o napna manchiani bidingo kobor ra·timgiparangna talatangengon, uamang Ri Bhoi a·jao songdongenggipa manderangni namgninasa chanchie maming dongnuani grian ia ja·kuko de·aha ine Ri Bhoi a·jao UDP-ko dilgipa Donbok Khymdet parakataha.
“Sakoba gisik sae ba sakoba ka·o nange chinga iako dakenga ong·ja indiba jolni namgnina chanchiesa chinga NPP-o napna tik ka·aha,” ine Khymdet aganaha.
Khymdet baksa NPP-o napangna tik ka·gipa UDP-ni dilgiparangara, UDP Ri Bhoi-ni chief adviser Raphael Massar, KHADC-ni gitcham CEM Rangkynsai Makdoh aro gipinrang ong·a.
