SHILLONG: Lok Sabha election-ni ja·man Meghalaya a·doko Trinamool Congress (TMC)-ni bang·bata dilgiparangan Bharatiya Janata Party (BJP)-o napna siengani gimin BJP-ni ‘team B’ gita ong·enga ine Meghalaya a·dokni Congress dol matnangatskaaha.
Meghalaya a·doko TMC baksa Lok Sabha election-na bakrimjahani gimin talataniko on·angengon, Meghalaya a·doko TMC-ko dilenggiparangni miksonganirangko ua Congress-ni high command-na u·iatmanaha ine Meghalaya Pradesh Congress Committee (MPCC)-ni president Vincent H Pala parakataha.
“Chinga TMC baksa bakrimgenchimoba uamangoni bang·batan BJP-o napangna siengani gimin maming namgni dongjawa. TMC-ni dilgiparang BJP-o napangna gita tarimanaha,” ine Pala aganaha.
MPCC president-ni aganani gitade, Ri Bhoi a·jao aro West Shillong-oba TMC-na kam ka·enggipa manderang, Congress-na kam ka·enggipa manderangkoba BJP-o napchina mol·molengachim.
INDIA Bloc-o apsan bakrimgipa dolrang ong·genchimoba ua aro Dr Mukul Sangma-ni gisepo ‘gaora’ dongani a·selan sakgni meligrikna man·jaha ine agananikoba ua jegalataha.
AICC high command-ni chu·gimik ra·chakchengani ja·mansa Meghalaya a·doko Congress doltangari susana tik ka·aha ine janapatengon, ua Congress dolni gipin dilgiparang baksa Mukul Sangma-ko Congress-ona re·bapilchina ba apsan kam ka·china mol·molahachim indiba uamangko gipin dilgiparangan BJP-o napchinasa aganskaaha ine Pala parakataha.
Tura parliamentary constituency-ode Congress aro NPP-ni giseposa susaani bilakbatna sienga ine janapatskaengon, Garo Hills-ode BJP dolan TMC-na bate chu·sokbatgen ine MPCC-ni president parakataha.
“Garo Hills-o TMC-na batede BJP-an vote-rangko man·batgen aro angni chanchiani gitade TMC dolde bon·kamgipasa ong·gen,” ine Pala aganaha.