SHILLONG: Meghalaya a·doko so·sojengjeng ong·atna jotton ka·gipa manderangni kosako sorkari rakbatsranggipa ja·kurangko de·gen ine a·dokni Chief Minister Conrad K Sangma mikrakataniko on·angaha.
A·doko ong·enggipa obostarangni bidingo nipilna gita tom·aniko Sonibar salo ong·atangani ja·man iako Chief Minister aganaha.
“Chinga maming dakeba so·sojengjeng ong·atna cholrangko on·jawa aro da·o na·simang baksa agangrikna skangba chinga Deputy Chief Minister, Director General of Police, Chief Secretary aro dingtang dingtang official-rang baksa iani bidingon chanchirimaha. Je manderangan a·doko so·sojengjeng ong·ataniko ra·bana jotton ka·anio jak donggenchim, uandakgipa manderangni kosako chinga rakbatsranggipa ja·kurangko de·anggen,” ine Chief Minister aganaha.
HNLC bobil dolni gitcham general secretary Cheristerfield Thangkhiew-ko so·otanio jak donggipa police officer-ko ma·simanaha ine adita salrangna skangsan HNLC bobil dol, ia police officer-ko so·ote galna ka·mikkenataniko on·angahachim.
HNLC-ni general secretary aro publicity secretary Sainkupar Nongtraw-ni parakatani gitade, Thangkhiew-ko so·ote galanio, MDA sorkarini ning·o donggipa mitam minister-rangni politics-ni gita jak donga ine uamang chanchichipenga.
“Cheristerfield-ni sianio jak donggipa mandeko chinga ma·simanaha aro chinga nang·ko sandie sasti on·enba so·ote galgen. Ia a·selni bidingo police-rangni dongnuna jotton ka·aniko chinga ma·siaha,” ine HNLC bobil dolni general secretary parakatahachim.
Iani bidingo sing·anina aganchakaniko on·angskaengon, batanggimin somoirangonin police-rang rakbee kamrangko ka·enga aro iandake ka·mikkenatanirangko bon·atnaba man·aha ine Chief Minister parakataha.
“A·doko tom·tomaniko rakkiangna gita police-rang sal-wal rakbee kamko ka·enga aro iandake so·sojengjeng ong·atna jotton ka·anio jak donggipa manderangni kosako rakgipa ja·kurangko de·gen,” ine Sangma aganaha.
