TURA: Meghalaya a·dokni Lok Sabha seat damgni, chong·motan Shillong aro Tura parliamentary constituency-rango susagija ma·mongni BJP dilgiparang, ia seat damgnion National People’s Party (NPP)-na chakpaaniko on·skana tik ka·angani ja·man BJP Meghalaya-ni state vice president aro GHADC-ni gitcham chief executive membor (CEM) Dipul R Marak, kamtangko wate BJP-oni ong·katskaaha.
An·tangni kam watani chittiko Marak, Sombar salo, BJP-ni state president Rikman G Momin-na on·ataha aro ia chittio ua, state vice president-ni kamko wate, Lok Sabha Prabash 2-Tura Parliamentary constituency aro 52 (ST) Rangsakona Mandal-o membor ong·aoni ong·katengaha ine parakataha.
Meghalaya a·dokni Lok Sabha seat damgnio susagija NPP-na chakskana gita ma·mongo BJP-ko dilgiparang tik ka·ahani gimin a·doko BJP-na kam ka·enggipa bang·bata manderangan BJP-ni state president Rikman G Momin-ko matnangtokskaengachim ine nikna man·a.
Ma·mongni dilgiparang, a·dokni seat damgnio susajana parakatani ja·man Garo Hills-oba BJP-ko dilenggiparang, Robibar salo tom·aniko ong·atangenba, ma·mongo BJP-ko dilenggiparangni tik ka·anina suk ong·gijaniko parakangtokahachim.
A·dokni Lok Sabha seat damgnio susana gita ma·mongni dilgiparangko didijahani gimin a·dokni mitam BJP dilgiparang, state president Rikman Momin-ni kamnaba kusi ong·gijaniko paraktokaha.