SHILLONG: Meghalaya a·doko Bharatiya Janata Party (BJP) susagija, National People’s Party (NPP)-na chakpaaniko on·na parakatani ja·man opposition dolrang, BJP aro NPP dolrangko apsan ‘rokomni’ dolrangan ine matnangtokengon, NPP-de darang jat aro toromkoba mikkang niteani dongja aro pilakkon chel·chakna gitasa on·kange kamko ka·enga ine Sombar salo, NPP-ni state president aro a·dokni Deputy Chief Minister Prestone Tynsong parakatskaaha.
A·dokni Shillong aro Tura Lok Sabha seat-rango susagija NPP-na chakskana gita BJP-ni parakatahani gimin opposition dolrangni matnanganirangko jegalatengon, election-ni somoiode pangnan iandake matnanggrikanirang dongaia ine Tynsong parakataha.
Tynsong-ni aganani gitade, 2018 bilsini Assembly election-na skangba, NPP-ko bilona seokatgenchimode a·dokni pilak gilja nokrangko chiptokgen ine opposition dolrang matnangtokahachim.
“2018 bilsini Assembly election-ni ja·man NPP, sorkariko rikaha indide NPP-chi dilenggipa MDA sorkari, manderangni olakkianirangko champengna jotton ka·ahama?” ine NPP-ni state president sing·doataha.
Dingtang dingtang jat aro toromrangko chel·chakna gitasa NPP, on·kange kamko ka·enga ine Tynsong aganaha.
“A·doko songdongenggipa dingtang dingtang Tribal-rangni daka rikanirangko chel·chakna gitaba chinga on·kange kamko ka·enga,” ine ua aganaha.
Shillong aro Tura Lok Sabha constituency damgnion NPP-ni candidate-rangna chakpaaniko on·na gita ma·mongo BJP-ko dilenggiparangni tik ka·aniko uamang kusi ong·en ra·chakaha ineba ua aganaha.
“Shillong aro Tura seat damgnion susana gita BJP-ni candidate-rang dorgastorangko galtokahachim indiba ia seat damgnion BJP-ni susajana tik ka·aniko knasoe chinga namen aiao inmanbeaha,” ineba NPP-ni state president aganaha.
BJP-ni chakpaaniko ra·chakanichi uamangba BJP-ni niamrangko aro bebera·anirangko ja·rikgen indakede ong·ja ineba ua aganaha.
