Chonchongipa jatrangni kosako ong·gija dakaniko warachaknasa ia election-o susaenga: Saleng

TURA: India a·songo chonchongipa jat aro toromrangni kosako ong·gija dakaniko warachakna gitasa ia Lok Sabha election-o susaenga ine Mongolbar salo, an·tangni nomination-ko file ka·angani ja·man Tura Lok Sabha constituency-ni Congress candidate Saleng A Sangma parakataha.
Mongolbar salo uan Tura constituency-o nomination file ka·chenggipa ong·aha aro uni nomination file ka·eani somoio MPCC-ni working president Deborah C Marak, gitcham MLA Brigady Marak aro Congress dolna kam ka·enggipa bang·bea manderangba dongpatokaha.
“India a·songara dingtang dingtang jat aro toromo bebera·giparangni ku·mong nangrime songdongchakgipa a·songsa ong·achim indiba da·alo a·songni pilak biaprangon mai ong·enga an·ching pilakan nikna man·enga. Manipur, Uttarakhand, Assam aro gipin a·dokrango mai ong·enga an·ching niate nina man·gen. Uamang pilakan Citizenship Amendment Act-ni kosako jegaltokenga. Unbaksa a·songni dingtang dingtang a·dokrango Uniform Civil Code-koba manderang jegaltokenga. A·songo tom·tomanian dongjaenga, uni giminsa a·songo tom·tomaniko man·piltaichina miksonganio chinga ia election-o susaenga,” ine Sangma aganaha.
A·songo tom·tomani aro namroro silroroaniko ra·bana kam ka·anio Congress dolmangmangsan ong·ja indiba gipin dolrangba Congress baksa bakrimenga ineba ua aganaha.
Meghalaya a·dokode CAA-ni niamrang nangchakeani dongjawa ine Chief Minister Conrad Sangma-ni agangipa kattarangni bidingo janapatengon, iani bidingo skia man·batgipa aro dal·dalbatgipa a·dokrangan jegaltokengon maini gimin Meghalaya a·dokni manderang ia kattako ra·chakgen ine Sangma sing·doataha.
“Uaba (Conrad) CAA-ni bakan ong·a aro uni nogipa Agatha-ba iana chakpaaniko on·aha. MP ong·e uni nogipaan CAA-na chakpaaniko on·manahani gimin uaba uko warachakna nangaignok. Shillong-ba CAA-ni ning·on ga·aka, Tura-ba CAA-ni ning·on ga·aka indide maikai manderang uni kattako bebera·na man·gen,” ine Congress candidate aro Gambegre MLA aganaha.
Shillong aro Tura Lok Sabha seat-rango BJP-ni susagija NPP-na chakpaaniko on·skaengani giminba ua ia dolgnini gisepo maming dingtanggrikanian dongja ine matnangataha.
“India-ko uamang Hindustan pil·atgen ine aganaha aro CAA-koba ra·gatdraaha. BJP-ni bang·a kamrangon NPP-ba chakpaaniko on·ahani gimin anga ia dolgnini gisepo dingtanggrikanikon nikja. India a·songo chonchongipa jatrangkosan kal·ake roenga ong·ja indiba Kristianrangni kosakoba dokkol ka·enga. Uni gimin chinga ia pilakkon warachakna miksonganirang donga,” ine Sangma aganaha.