TURA: Gitcham MCS officer Labenn Ch Marak-ba Tura Lok Sabha constituency-o Independent candidate ong·e susana gita Mongolbar salo, an·tangni nomination-ko file ka·angaha.
Tura-ko Winter Capital songchina aro Job Reservation Policy-ni roster system-ko ja·rikchina gita dabie jingjengatanio Labenn Ch Marak-ba bak ong·paachim ine nikna man·a.
Indake ong·engon, ia election-o ua seokako man·genchimode apsan daken Parliament-oba ua Tura-ko Winter Capital songchina, Job Reservation Policy-ni roster system-ko backlog policy-ko ra·gatchina aro Garo Territorial Council (GTC)-ko songchina gita ku·rang on·angkugen ine Marak, an·tangni nomination-ko file ka·angani ja·man kobor ra·timgiparangna parakataha.
“Job Reservation Policy-ni roster system-ko backlog policy-ko ra·gatchina aro Tura-ko Winter Capital songchina chinga dabienga aro iani bidingon angko jail-oba donaha. Ian angni miksonganiko bilakbatataha aro da·o anga ia dabianiko Parliament-ona ra·angna an·tangko tariaha. ANVC aro ANVC(B) dolrangni a·dok aro ma·mong sorkari songgigrikanio soi ka·grikani gita Garoland-na dabianiba chu·sokkujaengani gimin anga iani giminba ku·rang on·angkuna nangnikenga,” ine Marak parakataha.
Da·o ong·enggipa Tura MP Agatha K Sangma-ni kamrangni gimin sing·on, ua bilsi bongana gimachipe dongaiaha aro da·o election-ni somoiosa nakattaiaha ine Marak matnangataha.