VPP-na bate RDA vote-rangko bate man·gen: Kharjahrin
SHILLONG: Shillong Lok Sabha constituency-o susagija, Voice of the People’s Party (VPP)-ni candidate-na kamrangko ka·skachina agananiko United Democratic Party (UDP) aro Hill State People’s Democratic Party (HSPDP)-ni nangrime bikotgipa Regional Democratic Alliance (RDA) jegalataha.
Shillong Lok Sabha constituency-o an·tangtangni candidate-ko susaatgija VPP-ni candidate Ricky AJ Syngkon-ko cheatna gita dakchakskachina, Sombar salo VPP-ni president Ardent Miller Basaiawmoit, RDA-ni dilgiparangko didiatahachim ine nikna man·a.
VPP-ni tom·anirango bang·bea manderangni bak ra·aniko UDP aro HSPDP dolrangni nangrime rikenggipa RDA nikenggnok ine VPP-ni president Ardent Miller Basaiawmoit aganenba, ia election-o doltangni candidate-ko susaatgija VPP-ni candidate-na chakpaaniko on·ode nambatgipa ong·gen ine parakatahachim.
“Joltangni political dolrangko ma·sichakbebegipa ong·genchimode UDP aro HSPDP dolrang, VPP baksa bakrimna nangenga. Ia election-o RDA susagenchim ong·ode BJP aro NPP dolrangna kam ka·giparang inesa mesokani ong·aignok,” ine Basaiawmoit aganahachim.
Indake ong·engon, Shillong Lok Sabha seat-oni susagija VPP-na dakchakskachina agananiko VPP-ni candidate Robertjune Kharjahrin jegalatenba, ia election-o VPP-na bate uan chena gita cholrang nambatenga ine parakatskaaha.
VPP-de gital party-sa ong·e, kam ka·giparangba komia aro UDP gita MLA aro MDC-rangba bang·paja ine ua aganaha.
“VPP-na batede chingan Shillong Lok Sabha seat-ko chena cholrang nambatenga,” ine Kharjahrin aganaha.
A·dokna ILP-ko dabiani, Khasi ku·sikko Eighth Schedule-o napatani, Meghalaya-Assam simarango ong·enggipa golmalrangko namatani aro a·dokna namroro silroroaniko ra·baanian RDA-ni mongsonggipa kam ong·gen ineba ua aganaha.
“Tribal-rangni toromrangko chel·chakna aro Seng Khasi gita dakgipa bebera·anirangko chel·chaknaba chinga kam ka·gen,” ine RDA-ni candidate aganaha.
Shillong Lok Sabha seat-o UDP aro HSPDP dolrangan vote-rangko bang·bate man·gen ine an·tangni ka·dongchakenganiko parakatengon, 2019 bilsio BJP aro NPP dolgnian Citizenship (Amendment) Act-na chakgiparang ong·ani gimin ia election-o nangrime susaaniara una maming aiao inmanani dongja ine Kharjahrin aganaha.
Da·o ong·enggipa Shillong-ni MP Vincent H Pala-ni biapo gipinko seokani somoi ong·aha ineba ua aganaha.
 |
ReplyForward
|