SHILLONG: Meghalaya Democratic Alliance (MDA) sorkarini kamrangko matnangrongengani gimin Voice of the People’s Party (VPP)-ni sakbri MLA-rangko, an·tangtangni constituency-na mai namgnirangko ra·baaha ine National People’s Party (NPP) sing·doatskaaha.
Iani bidingo kobor ra·timgipa manderang baksa agangrikengon, VPP-ni MLA-rang, an·tangtangni daitorangko chu·sokatchengna nanga aro uamang opposition-o ong·e maming kamrangkon ka·na man·jaenga ine pa·sikenba dongnue dongna man·jawa ine NPP-ni working president Pyniaid Sing Syiem parakataha.
An·tangtangko seokgipa constituency-tangtangni manderangnan maming namgnirangko ra·bana man·jaenga ong·ode jattangna ka·saa ine chrik a·bokanichi maming namgni dongjawa ineba ua aganaha.
Syiem-ni aganani gitade, maming sakkirang grisa VPP, NPP-chi dilenggipa MDA sorkariko tangka paisa jakkalsreta ine matnangrongengachim.
Meghalaya Lokayukta-ni inquiry officer-rangko ra·galani bidingo VPP ku·rangkode on·ahachim ine gisik ra·atpilaniko on·angengon, ra·gala man·gipa Lokayukta officer-rangko kamo ra·pilchina dabie ramarango jingjengatani ja·manba VPP-ni dilgiparang, iako chu·sokatchipa man·jaha ine NPP-ni working president parakataha.
