SHILLONG: Adita salrangna skang, East Khasi Hills a·jani Ichamati-o gipin jat mande sakgniko so·otani bidingo KSU-ni membor sakgniko rim·ani ja·man, so·sojengjeng ong·atani kamrangko ka·jachina aro niamrangko pe·jachina gita NGO-rangna a·dokni Deputy Chief Minister aro Home Minister Prestone Tynsong, mikrakataniko on·ataha.
KSU-ni membor sakgniko rim·ani gimin jakbikpilani cholrang donga inenba Home Minister, dingtang dingtang dolrangna mikrakataniko on·ataha.
“Ia joltangni ba gipin jat NGO-rangnaba ong·china aro anga pilak dolrangkon skatang dakjachina mol·molenga. Dos donggipa manderangni kosako niam gita ja·kurangko de·anggen aro niamko darangba re·badena man·jawa,” ine Tynsong, kobor ra·timgiparangna aganaha.
Ichamati-o a·sel ong·aniara namen kragijani ong·aha ine janapatengon, mikkangchi iandakgipa kamrangko ka·jachina gitaba Tynsong, NGO-rangko mol·molataha.
“Uni gimin anga pilak NGO-rangkon iandakgipa kamrangko ka·jachina mol·molenga. Iandakgipa kamko darangan ra·chakna man·jawa. Darangba niamko pe·na bil dongja aro dosni kri niamo pangchake sastiko man·na nanga,” ine ua aganaha.
Deputy Chief Minister-ni parakatani gitade, Ichamati-o gipin jat mande sakgniko so·otgipani bidingo sorkari aro police-rang, sandirokanirangko dakengkua.
Ia a·sel ong·ani ja·man so·sojengjeng ong·na nanggenchimode maidakgipa ja·kurangko de·samsoenga ine sing·anina aganchakaniko on·angskaengon, “Kamrangko ka·anio ra·bianirangde dongaia indiba chinga iandakgipa ra·bianirangko chagrongna pangnan tarie donga. Niam pe·anirang ba so·sojengjeng ong·atani kamrang donggenchimode sorkari nanga gita ja·kurangko de·angaigen indiba angni agangimin gita ia a·selni bidingo ding·chaogrikaniko bariatjachina anga NGO-rangko mol·molenga,” ine Tynsong aganaha.
