SHILLONG: Shillong songjinmani North Eastern Hill University (NEHU) campus ning·o politics-ni kamrangko ra·bae golmal ong·atanirangko ra·bajachina gita ABVP aro WOSY dolrangko HYC mikrakataha.
“Da·alona kingkingan NEHU-o chatro chatrirangni politics baksa iandakgipa dolrangko bak ra·na on·jahani gimin chinga NEHU aro a·dok gimikon iandakgipa dolrangko golmal ka·na on·jawa. Mikkangchiba chinga iakon ja·rikangkugen,” ine HYC-ni education secretary Enlang Sawiang parakataha.
Sawiang-ni aganani gitade, BJP chatro chatrirangni dol ABVP, World Organisation of Students & Youths (WOSY) minggipa dolni bimingo NEHU campus-ona napdrabae program-ko ong·atna manchienga ine uamang koborko man·soaha.
NEHU campus ning·o WOSY-ni ABVP/RSS membor-rang baksa Holi manianiara dingtang dingtang jatni gisepo so·sojengjeng ong·aniko ra·bana aro politics kal·na miksonganisan ong·aia ineba HYC-ni education secretary parakataha.
Indita bilsirangna NEHU-ni chatro chatrirang aro kam ka·giparangba iandakgipa manianirangko ong·atengachim aro uamangko maming dakeba champenganirang dongjachim ineba ua aganaha.
“Indiba dingtang dingtang jatni gisepo so·sojengjeng ong·atna aro politics kal·na miksonge iandakgipa manianirangkode HYC ra·chakna man·teljawa. Chingna u·iatani gitade, NEHU campus-ni ning·o gipin biapni manderang baksa Holi manina gitaba uamangna permission-ko on·jahachim aro iani gimin chinga NEHUSU-ni office bearer-rangna chakpaaniko on·enga aro NEHUSU-ni vice president-ko jak sokanio jak donggipa pilak manderangkon raken jegalatenga,” ine HYC-ni education secretary aganaha.
Iani bidingo dos donggipa manderangni kosako niamo pangchake ja·kurangko de·china gitaba ua Police department-ko didiataha.
Police-rang maming ja·kurangko de·jagenchimode HYC-ni gita ja·kurangko de·skaenba, dos donggipa manderangni kosako rakgipa ja·kurangko de·anggen ineba Sawian mikrakataniko on·angaha.