TURA: South Garo Hills a·jani Durabanda songo Jal Jeevan Mission (JJM)-ni kamko matchotja ine Nokrek Area Development Committee (NADC), Meghalaya a·dokni PHE Minister Marcuise N Marak-na badi ka·doataha.
PHE Minister-na sedoatgipa chittio NADC-ni president Semronsing A Sangma-ni parakatani gitade, Durabanda songo JJM-ni kamrangko ka·ani bidingo uamang RTI ka·e am·sandiaton, ia songo ge 179 nokdangrang, chi pipe-rangko man·na nanga ine department-ni gita aganchakaniko on·ahachim indiba ia song gimiko ge 30 nokdangrangsan chi pipe-rangko man·engkua ine uamang nikna man·aha.
“Chingni RTI ka·e sing·sandianina aganchakaniko on·ani gitade, Durabanda A·gitokgre-o ge 125 nokdangrang, Durabanda Songgital-o ge 20 nokdangrang aro Durabanda Chambugonggre-o ge 34 nokdangrang chi pipe-rangko man·ani ong·achim aro Durabanda songgimiko chi pipe-rangko man·na nangenggipa ge 179 nokdangrangoni gimik ge 30 nokdangrangan chi pipe-rangko man·engkua ine chinga nikskana man·aha. Bangki ge 149 nokdangrangde ia JJM-ni ning·o chi pipe-rangko soke man·tokkujaenga,” ine NADC-ni president parakataha.
Sangma-ni parakatani gitade, ia songo JJM-ni kamko Tura Upper Rongkhon-oni saksa Rahendro M Sangma minggipa contractor-na on·e, South Garo Hills a·jao donggipa Sasatgre songni saksa Tengton M Sangma minggipa mande, sub-contract ra·skaahachim.
“Chingni RTI ka·anina department-ni gita aganchakaniko on·ani gitade, ia JJM-ni kamna gong 57,28,000-ko sanction ka·aha aro ia tangka chu·gimikkon contractor, Durabanda songo kam matchotgija oke ra·tokaha,” ine NADC-ni president parakataha.
Kamni tangkarangko oke ra·na gita sub-contract ra·gipa Tengton M Sangma, Durabanda Chambugonggre Nokmani No Objection Certificate (NOC)-ko taridrae ra·aha ineba NADC-ni president matnangataha.
Durabanda songo JJM-ni kamko matchotgija donahani a·sel Durabanda songni manderang china diltokengaha ine janapatengon, iani bidingo sandirokatenba, kam matchotgija ka·gipa contractor-ni kosako rakgipa ja·kurangko de·china aro Durabanda songo JJM-ni kamko matchotatchina NADC, a·dokni PHE Minister-ko didiataha.