SHILLONG: Re·baenggipa Lok Sabha election-rangna Meghalaya-o dongipa polling station-rangoni dam 500 mang ong·nasipilgipa polling station-rangode kenchakna ba simsakna nangao ga·akgiparang ong·enga.
Chief Electoral Office-oni parakani gitade, Meghalayao simsakna nanggipa polling station-rang dam 477 donga aro dam 3,512 polling station-rangoni dam 29-de simsakna nangbatgipa ong·enga.
Iarang baksana Me·chikrangchi nirokgipa dam 88 polling station-rangba donggen, unomitingo dam 10 polling station-rangkode PWD-rang nirokanggen.
Chadamberangchi nirokgipa dam 37 polling station-rangba donggen.
Meghalaya-o, Tura aro Shillong ia ge·gni Lok Sabha seat-rangna salsanon April 19 tariko puonatenga, jeon me·sa sak 1099517 aro sak 1127047 me·chik voter-rangko man·chape gimikchi sak 2226567 voter-rang ua salo puonanggen.
Ia chang election-o sak 10180 a·gipi citizen voter-rang sak 11720 PWDs ba be·enni gita neng·nikani gnanggiparang donga.
Iarang baksana nokoni puonatnagiparangba sak 6106 donga.
