TURA: National People’s Party (NPP)-chi dilenggipa MDA sorkarini kamrangna Garo Hills-ni bang·bata biaprangon NPP-na chaktokenga aro ia election-o manderangni bakrimanichi ua seokako man·piltaina ka·dongenga ine Sukrobar salo, NPP-ni candidate aro Tura-ni Lok Sabha MP Agatha K Sangma, Kharkutta-ni Watregittim songo, Lok Sabha election-na campaign ka·engmiting somoio aganaha.
Agatha-ni aganani gitade, Garo Hills-ni bang·a biaprangon manderang NPP-na chaktokenga aro dingtang dingtang dilgiparangba una kamrangko ka·e on·tokenga.
“Garo Hills-ni dingtang dingtang biaprang, jekai Songsak, Rongjeng aro uandakgipa biaprangona angni re·angon anga bang·en manderangni chingna chakpaanirangko nikna man·aha. Uni gimin ia somoio anga NPP-na chakenggipa manderang pilakkon mittelpilna ska,” ine Agatha aganaha.
Ua an·tangde MP ong·genchimoba pilak biaprangonade re·angna man·paja ine janapatengon, uni pal Garo Hills-ni dingtang dingtang biaprangona re·ange manderangko grongenganina ua NPP-ni dingtang dingtang dilgiparangkoba mittelpilangaha.
Ia tom·anio ua NPP-chi dilenggipa MDA sorkarini ra·gatgipa dingtang dingtang scheme aro program-rangni giminba songni manderangna agan-talate on·angjolaha.
