SHILLONG: Garo Hills-o BJP-ni dilgiparangko, a·dokni Chief Minister aro NPP-ni national president Conrad K Sangma, Robibar salo gronge agangrikangnaba gnang.
Garo Hills-o BJP-ni membor-rangko NPP-ni dilgiparang nichanggalenga ine matnangenba, ia Lok Sabha election-o NPP-ni candidate-na kam ka·na siktokjaengachim ine nikna man·a.
Lok Sabha election-o NPP-ni candidate-na kamko ka·na skangba NPP-ni president, Garo Hills-o BJP-ni membor-rangko gronge agangrikchengna nanggen ineba BJP-ni dilgiparang dabitokengachim.
Ia Lok Sabha election-o Meghalaya a·dokni Lok Sabha seat damgnion, mongsongbate Tura Lok Sabha constituency-o susagija NPP-na chakpaaniko on·skana gita ma·mongni dilgiparang tik ka·ahani gimin Garo Hills-o BJP-ni bang·bata dilgiparang aro kam ka·enggiparangba suk ong·niktokjahachim.
Tura Lok Sabha seat-oni susana gita ma·mongni dilgiparangko didijahani gimin mitam dilgiparang, BJP-ni state president Rikman G Momin-koba kamoni ra·galchina nangniktokengachim.
Adita salrangna skang, NPP-ni tom·aniko Garo Hills-ni biap damsao ong·atanio, BJP-ni candidate-ko NPP ‘switched off’ ka·ata ine Mahendraganj MLA Sanjay A Sangma-ni aganahani giminba BJP-ni dilgiparang suk ong·jae, uko kema bi·china gita dabiangahachim.
Indake ong·engon, BJP-na kam ka·enggipa aro dilgiparangni kosako gisik saatani kattarangko aganjachina gita BJP-ni cabinet minister AL Hek-ba NPP-ko didiataha.
BJP-o kema bi·china gita NPP MLA-ko didiatengon, “Iani bidingo dingtangmancha chittiko chief minister-na on·atmanaha aro uni aganchakanina BJP sengkuenga,” ine Hek parakataha.