SHILLONG: Ia bilsini Lok Sabha election-na Indian National Congress (INC)-ni manifesto ba miksonganirangko Sukrobar salo oprakataha.
Lok Sabha election-na Congress dolni manifesto-ko oprakatani ja·man Youth Congress-ni vice president Bamphiralang Basaiawmoit, kobor ra·timgiparangna talataniko on·angengon, ia manifesto ba miksonganio hajirako salprako gong 400 on·na, kangal cholgri nokdang ge·antinan bilsiprako gong laksako on·na, ma·mong sorkarini kamrango me·chikrangna 50 percent-ko kangna, game ge·e cha·enggipa Minimum Support Price aro national caste census-ko dakanian mongsonggiparang ong·enga ine parakataha.
Mikkang bilsi 10-ni gisepo rama jal·lang aro nok rikanirangko namdapatna, a·songo songdongenggipa kror 23 manderangni janggi tangani gadangko namdapate kangal cha·a sianiko bon·ataniba Congress dolni miksonganirang ong·enga ineba Basaiawmoit aganaha.
Sorkarini kamna dorgasto galani kajinako bon·atna, sanna banani kamrangna lak 25-ona kingking cashless health insurance-ko on·na, ma·mong sorkarini dingtang dingtang gadangrango lak 30 bangbang ong·e dongenggipa kamrangko gapatna aro uandakgipa dingtang dingtang kamrangba ia Lok Sabha election-na Congress dolni miksonganirang ong·enga ineba Youth Congress-ni dilgipa parakataha.