SHILLONG: Chief Minister-ko ja·rikgipa Arunachal Pradesh-o NPP baksa meligipa contractor saksani garioniko grong krorsa tangako man·ani ja·mano ua a·sel giminan NPP-ko raken matnange ua mamlako che·em che·em sandichina Congress dabiaha.
Meghalaya-o NPP-ni namen meligipa contractor-oniko ua tangkarangko man·aha ine Meghalaya Pradesh Congress Commit-tee working president, Deborah Marak aganaha.
A·songo Meghalaya kangalgipa a·dok damsa ong·aniko janape, a·dokni manderangni neng·bee man·enggipa tangkako Arunachal Pradesh-ona ra·angani a·selko Marak sing·doaha.
Ia chasong tangkako jako ra·bitgijagipa aro digital-ni gita tangka gamna man·gipa chasong ong·a aro election-ni somai-mitingo indake tangka bang·en ra·e re·aniara election-na miksonge una tangkarangko jakkalna ra·angenganiko mesok-enga ine NPP-ko mat-nangaha.
Ia tangka man·ani a·sel gimikna NPP-o agan-jik-jakanirangko man·engon, NPP National president aro Chief Minister Conrad Sangma jean social media-ko namen jakkalgipa ong·a da·ona kingking ia a·selni gimin jrip jrip dongkuenga.
Mija Bristibar-o Aruna-chal Pradesh-ni Longding district Kanubari check post-o Chief Minister Conrad K Sangma-ko sepangchapchap ja·rikgipa SUV-oniko gong krorsa tangkako rim·aha.
Tangkako Assam-o register ka·gipa (AS ET 5252) Fortuner garioniko man·aha. Ua gari Badri Rai & Construction Ltd-ni Executive Director Harsh-vardhan Singh-ni ong·a.
Ua tangkarangko flying squad aro static surveillance team-rang rim·aha. Ua rim·gipa tangkarangko namedake sandijana kingking naljoke rakkiani a·selrangna SBI-na watataha.