SHILLONG: UDP aro HSPDP dolrangni nangrime rikgipa Regional Democratic Alliance (RDA)-ko gipin dolrang baksa nangatna jotton ka·aniara election-na chalakki dakanisan ong·aia ine United Democratic Party (UDP) parakataha.
RDA-de jakgitele chakatgipa dolsa ong·a ine janapatengon, Citizenship Amendment Act (CAA)-ko uamang raken jegalkuenga aro Inner Line Permit (ILP)-na dabianio chakpaaniko on·engkua ine UDP-ni general secretary Jemino Mawthoh parakataha.
“RDA-ko gipin dolrang baksa nangatna jotton ka·aniara chingko onchepna jotton ka·anisa ong·enga. Chingni CAA-ko jegalani aro ILP-na chakpaanide kakketan ong·a,” ine UDP-ni general secretary aganaha.
RDA-ko ning·in ning·in gipin dolrangna chakgipa ine matnanganiko jegalatengon, UDP aro HSPDP dolrang, manderangni nanganirangna ku·rang on·na gitasa RDA-ko bikote ja·ku de·enga aro RDA-ko gipin dolrangna chakgipa ine matnanganiara kakket ong·ja ine Mawthoh parakataha.
Indake ong·engon, UDP aro HSPDP dolrangni nangrime rikgipa RDA-ni apsan candidate-ko Lok Sabha election-o susaatengani gimin VPP-ni president Ardent M Basaiawmoit sing·doatskaaha.
VPP-ni candidate Ricky AJ Syngkon-na campaign ka·engmiting somoio jinmana aganprakangengon, HSPDP-ni membor-rangde election-na tom·anirang dongparongjachim indide maikai dolgni nangrime candidate-ko susaatani ong·enga ine Basaiawmoit sing·doataha.
BJP aro NPP baksa MDA sorkario bakrimenba, Hindu-rangni bebera·aniko jegalengani giminba VPP-ni president, UDP-ko matnangataha.
