SHILLONG: Tura Lok Sabha constituency-o National People’s Party (NPP)-ni candidate Agatha K Sangma, bang·bea vote-rangchi cheenba Tura-ni MP-na seokako man·piltaigen ine Siju-Rongara constituency-ni NPP MLA aro a·dokni Education Minister Rakkam A Sangma, an·tangni ka·dongchakenganiko parakataha.
Tura Lok Sabha seat-o NPP-ni candidate Agatha Sangma, Indian National Congress (INC)-ni Saleng A Sangma, Trinamool Congress (TMC)-ni candidate Zenith M Sangma aro Independent candidate Labenn Ch Marak baksa susaengachim ine nikna man·a.
Indake ong·engon, Opposition dolrang, chong·motan INC aro TMC dolrangde ia election-o chena man·jawa ine an·tangtangan ma·simanaha aro NPP-ni candidate-an bang·bea vote-rangko chepiltaigen ine NPP-ni dilgipa parakataha.
“Garo Hills gimikon NPP-na balwa balanirangko nigenchimode aro Agatha Sangma-ni campaign ka·anirangko niatgenchimode Meghalaya a·dokni itihas-o NPP-ni candidate, bang·batgipa vote-rangchi chegen ine mesoksoani ong·enga. Opposition dolrangni campaign ka·anirangko niatskagenchimode uamang campaign ka·nan gisik nangjaenga gita nika, maina uamang ia election-o cheteljawa inen ma·simanaha,” ine Sangma aganaha.
Ma·mongo NDA-an sorkariko rikpiltaina siengani gimin Opposition dolni candidate-rangko watatede maming namgni dongjawa ineba Education Minister aganaha.
“Ma·mongo BJP-chi dilenggipa NDA-an sorkariko rikpiltaina siengani gimin Agatha-ko MP-na seokpiltaie watatanian Meghalaya a·dokna aro Garo Hills-naba namgni ong·gen. Congress ba TMC-ni candidate-rangko seoke watatgenchimode Opposition-osa ong·na nangaigen, indide uamang mai namgniko ra·bana man·gen?” ine Sangma sing·doataha.
Batanggimin chang NDA sorkario Agatha Sangma-ba dambebatsranggipa union minister ong·ahani gimin ia changoba uko me·chik minister dake songpiltaichinaba Sangma, ma·mong sorkariko mol·molataha.
“Union Cabinet-o salgro salaram jolni dilgipako nangengani gimin Agatha-na Cabinet-o biap on·genchimode uan salgro salaram jol gimiknan namgni ong·gen,” ine ua aganaha.
