SHILLONG: Sombar salo, National People’s Party (NPP) aro Voice of the People’s Party (VPP)-na kam ka·enggipa manderangni gisepo adita nanggrikangani ja·man, election-na campaign ka·engmiting somoio VPP-ni manderang, chrik a·bokanirangko dakenba golmal ka·na aro so·sojengjeng ong·atna jotton ka·aha ine NPP matnangatskaaha.
Sombar salo, NPP-ni candidate Ampareen Lyngdoh-ni Umsning-o campaign ka·engmiting somoio VPP-ni membor-rang, ‘Ha u Prah’ ine chrik-a·bokani ja·man dolgnini gisepo adita nanggrikaniko nikna man·ahachim.
Iandake election-na campaign ka·engmiting somoio chrik-a·bokanirangko dake golmal ka·na jotton ka·ahani gimin VPP-ni dilgiparangko jegalatengon, an·tangtango maming niksamsoani dongjani a·sel manderangko salna man·jaesa, VPP-ni dilgiparang ‘mitchigrikani politics’-ko kal·skana jotton ka·enga ine Mongolbar salo NPP-ni ku·wattimgipa HM Shangpliang parakataha.
“NPP candidate-ni campaign ka·engmiting somoio golmal ka·na jotton ka·ahani gimin aro NPP candidate-ni kosako kragijagipa kattarangchi aganahani gimin chinga VPP-ko aro VPP-na kam ka·enggipa manderangko raken jegala,” ine Shangpliang parakataha.
NPP-ni tom·anirangko golmal ka·na jotton ka·ahani gimin VPP-ko dilenggipa manderangni kosako rakgipa ja·kurangko de·china Election Commission-ko didienga ineba NPP-ni ku·wattimgipa parakataha.
“VPP-ni dilgiparang, manderangko salna man·jaenga ine ian mesokani ong·enga. Maming niksamsoani gri manderangko salna man·jae VPP-ni dilgiparang, mitchigrikani politics-ko kal·skana jotton ka·enga,” ine Shangpliang aganaha.
“Ia a·sel ong·aniara, NPP-ni kosako matnanganirang cholijaengaha ine VPP-ni ma·sianiko mesokanisa ong·enga. Uni giminsa da·o uamang chingni kosako bilrangko mesokna jotton ka·skaenga. Ia election-o VPP, West Bengal-ni sabisiko ra·bana jotton ka·enga ine Mawryngkeng-ni NPP dilgipa Pyniaid Sing Syiem-ni matnanganiara ong·akon aganaha maina iandakgipa obostarangan VPP-ko TMC-ni B team ine mesokani ong·a,” ine NPP-ni ku·wattimgipa parakataha.
Gipin political dolrangni election-na campaign ka·aniko golmal ka·aniara ECI-ni dongimin niamrangko pe·ani ong·a ineba ua VPP-ni kosako rakgipa ja·kurangko de·china ECI-o dabiangaha.
A·doko so·sojengjeng ong·na nanggenchimode VPP-ni dilgiparangan dosko ra·na gita nanggen aro iani bidingo uamang VPP-ni kosako bilaken badi ka·doanggen ineba Shangpliang parakataha.
“Ia apsan manderangan rongtalgipa politics-ni gimin aganenga indiba uamangni kamrangde bilpilsa ong·skaenga. VPP-ni dilgipa Ardent Basaiawmoit, an·tangni agangipa kattarangko kamchiba ja·rikna nanga aro iandakgipa politics-ko kal·e manderangni tom·tome songdong a·chaaniko golmal ka·na nangja,” ine NPP-ni dilgipa parakataha.
Iani bidingo VPP-ba NPP-ni kosako a·dokni Chief Electoral Officer-na badi ka·doangskaahachim ine nikna man·a.
