SHILLONG: Sombar salo, NPP-ni election-na tom·anirangko ong·atanio golmal ka·na jotton ka·aha ine matnangahani gimin KHADC-ni chief executive membor (CEM) aro NPP-ni dilgipa Pyniaid Sing Syiem-ni kosako Voice of the People’s Party (VPP), a·dokni Chief Electoral Officer (CEO)-na badi ka·doangaha.
Ia a·selni bidingo NPP-ni dilgiparangko matnangatengon, “NPP-ni election campaign ka·ani somoio VPP golmal ka·na aro so·sojengjeng ong·atna jotton ka·aha ine NPP-ni dilgipa Pyniaid Sing Syiem-ni matnanganiara maming pangchakani gri aro tol·e matnanganisan ong·aia,” ine VPP-ni ku·wattimgipa Batskhem Myrboh parakataha.
NPP-ni election campaign ka·engmiting somoio VPP-ni manderang, chrik a·boke golmal ka·aha ine matnangenggipani bidingo sakkiko mesokchina gitaba ua dabiangaha.
“Ua somoio chrik a·boke NPP-ni tom·aniko golmal ka·gipa manderangara VPP-ni manderang ine sakki donga ong·ode mesokchina,” ine Myrboh dabiataha.
Iandake saksa sakgni manderangni ong·gija dakanichi dolgnini gisepo dinggrikaniko ra·bana jotton ka·ahani gimin ia manderangni kosako niamo pangchake rakgipa ja·kurangko de·china gitaba VPP dabiangaha.
“Ua somoio NPP-ni dilgiparang, chonbegipa a·selkon champengna gita man·jae, dolgnini gisepo dinggrikanikosa ra·bana jotton ka·aha aro ian NPP-ni kam choligijaniko mesokani ong·aha. Chrik a·bokaiani gimin manderangko rim·china police-rangko ge·etaniara namen kragijani ong·aha. Ian NPP-ko dilenggipa manderangni namgijaniko mesokani ong·a aro iani giminsa manderang NPP-ko namniktokja,” ine Myrboh parakataha.
Iandake skatang chrik a·bokanirangko dakjachina aro election-ni somoio pu·onanichisa a·jak sokchina gitaba ua VPP-na chakenggipa manderangko didiataha.
