SHILLONG: UDP aro HSPDP dolrangni nangrime bikotgipa Regional Democratic Alliance (RDA)-ni election manifesto-ko Mongolbar salo oprake on·angaha aro ia manifesto-o Uniform Civil Code (UCC), Anti Conversion Laws aro Kristian gita dakgipa toromrangni kosako ong·gija dakgipa manderangni kosako jegale, dos dakgipa manderangna rakbatgipa sastirangko on·china dabina ku·rachakaniko on·angaha.
Lok Sabha election-na RDA-ni manifesto ba miksonganirangko parakatengon, Kristian dolrangna aro gipin chonchongipa toromrangna gipin a·songrangoni tangka paisani gita dakchakanirangko on·atchina didina rake kamko ka·gen ine UDP aro HSPDP-ni dilgiparang talatangaha.
Meghalaya a·dokni pilak biaprangkon Citizenship Amendment Act (CAA)-oniko watchina didina jotton ka·gen ine janapatengon, a·doko Hindi ku·sikko official language dake ra·gatna jotton ka·aniko, a·song ge·san ku·sik mingsan dakna miksonganiko, a·song ge·san torom mingsan dakna miksonganiko aro chonchongipa jatrangni kosako ra·gatgipa niamrangko jegalanggen ine RDA-ni dilgiparang parakataha.
“A·songo dingtang dingtang jatrangna on·gimin bilko rakkiangna gita matchu be·en champenganiko jegalani aro Indo-Nepal treaty-ko nipilchina dabianian RDA-ni mongsonggipa daitorang ong·gen,” ineba RDA-ni manifesto-o janapaha.
ILP-ko ra·gatchina dabianiko bilakbatatgen ine ku·rachakaniko on·angengon, simarangko kapengani bidingo aro Police border wing-ko songna gitaba RDA bilaken dabianggen ine UDP aro HSPDP-ni dilgiparang parakataha.
HNLC aro gipin bobil dolrang baksa tom·tomanina agangrikaniko dakangkuchina dabiangkugen ine janapatengon, anti corruption law-ko bilakbatatna aro sorkari pilak project aro program-rangkon social audit-ko dakna gita ja·kurangko de·anggen ine RDA-ni manifesto parakataha.
Meghalaya a·doko rong·mesak bikotaniara samtangtango ong·telaigiparangna nangchakeaniko ra·bana siengani gimin raken jegalangkugen ine janapatengon, a·doko ST aro SC list-ko nipiltaichina gitaba RDA bilaken dabiangkugen ine manifesto-o ku·rachakaniko on·angaha.
Khasi aro Garo ku·sikrangko Constitution-ni Eighth Schedule-o chapatchina dabian baksana a·doko ma·mong sorkarini office-rango recruitment-na Khasi aro Garo ku·sikrangkoba jakkalchina dabianggen ine UDP aro HSPDP dolni dilgiparang parakataha.
Ma·mong sorkarini office-rango category C aro D-na Schedule Tribe (ST)-rangna 44 percent-ko dabina, contractual kamrango a·dokni manderangna 100 percent reservation-ko aro a·dokni autonomous districy council (ADC)-rangko mangrakbatatna gitaba RDA ku·rachakaniko on·angaha.